ကောင်မလေးသည် ကြောင်ကလေးများနှင့် ငယ်ငယ်ကတည်းက ကစားဖေါ်ကစားဖက်များဖြစ်တာကြောင့် ကြောင်အော်သံကြားမိတိုင်း နားစွင့်တတ်လေသည်။
တနေ့သော် .. ကြောင်လေးတစ်ကောင်အော်သံကြားရသည်မှာ သုံးရက်ဆက်တိုက်ဖြစ်လာသည်၊ ပုံမှန်မဟုတ်သော အခြေအနေတစ်ခုဖြစ်လိမ့်မည်ဟု ယူဆကာ ရှာဖွေရေးစတင်ခဲ့ပါ၏။
လူအသုံးနဲသော တိုက်အတက်အဆင်းလှေကားတွင် (ဓာတ်လှေကားရှိသောကြောင့်) အကြောက်လွန်သော အသက် ၂-နှစ်အရွယ် အဖြူရောင်ကြောင်လေးတစ်ကောင်တွေ့ရပါသည်။
ကြောင်ကလေးသည် ကြောက်လွန်းလို့ တုန်ရီစွာ လှေကားထစ်များကြားတွင် ပုန်းနေ၏။ တုန်ရီနေသောကြောင်ကလေး အကြောက်ပြေစေရန် ချော့ပြီး သူမအခန်းသို့ ပွေ့ချီခေါ်ခဲ့ပါသည်။
သူမ ကံမကောင်းပါ။ အဘယ်ကြောင့်ဆိုသော် ကြောင်ကလေးပုံစံမှာ သူ့မူလသခင်ကိုသာ ရှာဖွေလိုပုံပေါ်သည်။ ကြောင်တို့နှစ်သက်ရာအစားအစာများ ကျွေးပါသော်လည်း သူမကို တွယ်တာပုံမပေါ်၊ ဆော့ကစားပါသော်လည်း မဆော့သော ကြောင်လေးကို သူမ အလွန်သနားပါသည်။ သူနှင့်ရင်းနှီးဖို့ အချိန်လိုမည်။ ဂရုစိုက်စောင့်ရှောက်မှုတွေလိုမည်။ ဘယ်အစာကို နှစ်သက်သလဲ သူမ သိရန် ကြိုးစားရမည်။ သို့သော် သူမသည် ယခုလိုအချိန်တွင် ကြောင်ကလေးတစ်ကောင်အတွက် အချိန်ပေး ဂရုစိုက်ပြုစုစောင့်ရှောက်ဖို့ မလွယ်ပါ။ ကြောင်လေးများသည် ပြုစုယုယမှု အလွန်နှစ်သက်တတ်ကြသည်မဟုတ်လားးး။
ကြောင်လေး အိမ်ပြန်ချင်သည်ကို သူမ ဘယ်လိုကူညီရင်ကောင်းမလဲ၊ သူ့သခင် ဘယ်သူလဲ မသိ၊ နေရာလည်း မသိ။ ခက်ပြီ။
သူမနေသော တိုက်တွင် အခန်းပေါင်းများစွာ ရှိပါသော်လည်း လူနဲပါသည်။ တိုက်ခန်းမှ လူများအားလုံးလိုလို ကြောင် သို့မဟုတ် အိမ်မွေး ခွေးငယ်လေးများ မွေးထားကြသည်။ ထို့ကြောင့် ကြောင်လေးကို ဖမ်းပြီး သတ်စားမယ့်သူတွေတော့ မရှိလောက်ပါဘူး။ ကြောင်ကလေးကို ပွေ့ချီ၍ လှေကားဘက်သို့ လာကာ ကြောင်လေးကို ချပေးပြီး သူ့အိမ်ပြန်ရန် လမ်းစ မှတ်မိလိုမှတ်မိငြား စောင့်ကြည့်နေမိသည်။ သူမ အိမ်မှ ကြောင်လေးတစ်ကောင်သည် ရှစ်လကြာမှ အိမ်သို့ ပြန်ရောက်လာခဲ့ဖူးသည်။ ကြောင်ပျောက်တုန်း ငိုခဲ့ရသော ရက်တွေကို သတိရပြီး အခုကြောင်လေး၏ သခင်သည်လည်း စိတ်ပူနေရှာရော့မည်လို့ တွေးမိပြန်သည်။ ကြောင်များသည် မိုင်ငါးဆယ်အတွင်း မိမိနေထိုင်ရာ သခင်အိမ်သို့ အနံ့ခံအာရုံဖြင့် ပြန်တတ်ကြလေသည်။
နှာခါင်းလေး ရှုံ့ပွရှုံ့ပွလုပ်ကာကြောင်လေးသည် လှေကားတစ်လျှောက် စတက်စဉ် သူမ အသာလေး လစ်ကာ အခန်းပြန်လာခဲ့လိုက်သည်။ သူမကို မတွယ်တာစေချင်တော့၊ သူကိုယ်တိုင် လွတ်လပ်စွာ သူ့အိမ်ကို ပြန်စေချင်ပါသည်။ သူမ-ရှိနေလျှင် စွန့်စားတော့မည်မဟုတ်။ သူကလေးကလည်း ခေသူမဟုတ်၊ ခဏနေတော့ သူမအခန်းဝသို့ ပြန်လိုက်လာသည်၊ ညောင် ညောင်နှင့် အော်ခေါ်သည်၊ တံခါး မဖွင့်ပေးပဲ ငြိမ်သက်စွာနေလိုက်သောအခါ စိတ်လျော့သွားပုံရပါသည်။ နောက်ပြန်လှည့်ကာ လှေကားထစ်များဆီ ပြန်သွားလေသည်။ တစ်နာရီခန့်ကြာသောအခါ ကြောင်အော်သံမကြားရတော့။ နောက်ရက်များတွင်လည်း ထိုကြောင်လေးကို မတွေ့ရတော့ပါ။ သူကလေး သူ့သခင်ကို ရှာဖွေတွေ့ရှိသွားပုံရပါသည်။ သူမသည်လည်း စိတ်အေးသွားသည်။
ကြောင်ကလေးမှာ ကြောင်ချစ်သူများအကြိုက် ဝဝကစ်ကစ်ချစ်စရာ ဖြူဖြူလေးဖြစ်သည်။ အညစ်အကြေများ ကင်းစင်နေပုံကို ကြည့်ခြင်းဖြင့် သူ့သခင်က အတော်လေး ဂရုစိုက်မှု ချစ်ခင်မှုတို့ ပေါ်လွင်နေပါသည်။
ဘာပဲဖြစ်ဖြစ် သူမနှင့်နေလျှင် သူ့သခင်လောက် ဂရုစိုက်ခံရမည်မဟုတ်၊ သူမလို အလုပ်အာရုံတွေကြား စိတ်နှစ်ထားတတ်သော ကြောင်ချစ်သူတစ်ယောက်အနေဖြင့် ချစ်စရာကောင်းသော ကြောင်ဖြူဖြူလေးကို မပိုင်ဆိုင်သင့် မပိုင်ဆိုင်ထိုက်ပေ။
အဓိက တခြားအကြောင်းကတော့ ကြောင်ကလေးသည် သူမအခန်းသို့ ခေါ်ဆောင်လာပါသော်လည်း သူ့အသွင်မှာ ကိုယ့်အပေါ်ခင်မင်လိုပုံမပေါ်၊ စိမ်းကားသည်လည်း မဟုတ်၊ ယာယီနားခိုပုံသာပေါက်နေသောကြောင့်ဖြစ်ပါသည်။
ထို့ကြောင့် ကြောင်သခင်နှင့် ကြောင်ကလေးတို့ ပြန်တွေ့ဆုံရေး လမ်းစပေးကာ ကြောင်ကလေးကို လမ်းကြောင်း ... ပေးခဲ့တာလည်းဖြစ်ပါသည်။
ကြောင်လေးသည်လည်းကောင်း၊ ကြောင်လေး၏ သခင်သည်လည်းကောင်း၊ သူမသည်လည်းကောင်းးးးးး။
တခါတရံ ဖြစ်ချင်တာထက် ဖြစ်သင့်တာကို ပြုလုပ်ခြင်းသည် ဖြစ်ချင်တာတွေ ဖြစ်စေသည်မဟုတ်ပါလား။
.
.
.
.
.
သူသည် ကောင်လေးတစ်ယောက်မဟုတ်၊ ကြောင်လေး တစ်ကောင်ဖြစ်သည်။
လေးစားစွာဖြင့်
ခရစ္စတလ်
No comments:
Post a Comment