သတ္တဝါအပေါင်း စိတ်ချမ်းသာ၊ ကိုယ်ကျန်းမာကြပါစေကြောင်း ဆုတောင်း မေတ္တာပို့သပါတယ်.........

Tuesday, May 27, 2014

“အဆိပ်သင့် မြတ်နိုးခြင်း”

၁၈-ရာစုခေတ်က ပုံပြင်မဟုတ်ခဲ့တဲ့ အရှေ့တောင်အာရှက ဇာတ်လမ်းလေးတစ်ခုပေါ့။ တကယ့်အဖြစ်အပျက်တွေက ဝတ္ထုထဲက ဇာတ်လမ်းတွေထက် ပိုရသမြောက်ပါသေးတယ်။

ဘုရင်စနစ်တွေမှာ ဆွေမျိုးစဉ်ဆက်ဘုရင်ဆက်ခံကြ၊ မင်းကောင်းမင်းမြတ်တွေ ပေါ်ထွန်းခဲ့သလို စံစားသွားကြတဲ့ သူမျိုးတွေလည်း ရှိခဲ့ကြပါတယ်။

၁၈-ရာစုခေတ်လယ်ကျော်က ဘုရင်တစ်ပါးက တူတော်မောင်ကို နန်းအပ်ပြီး သမီးတော်အကြီးကို မိဖုရားခေါင်ကြီးအဖြစ်မြှောက်စေခဲ့ပါတယ်။ ဒုတိယသမီးတော်ကိုလည်း အဲ့ဒီဘုရင်နဲ့ပဲ လက်ဆက်စေခဲ့ပြန်ပါတယ်။

မင်းသွေးမင်းသစ်တစ်ပါး .. အရွယ်အားဖြင့် ၁၈နှစ်သာရှိသေးတဲ့အတွက် မောင်နှမဝမ်းကွဲလည်းဖြစ် မိဖုရားလည်းဖြစ်လာတဲ့ ချစ်သူကို အလွန်မြတ်နိုးခဲ့ဟန်တူပါတယ်။

တခါတော့ ဘုရင်နဲ့မိဖုရားခေါင်ကြီးတို့ အလည်အပတ်ထွက်ရာ မင်းတို့ ခေတ္တနားနေရာစံမြန်းတဲ့ နန်းတော်တစ်ခုကို မိဖုရားကြီးက နှစ်သက်တော်မူလို့ ပြန်လည်ပြင်ဆင် သာယာတင့်တယ်စေရန်ပြုပြင်ပေးတော်မူခဲ့ပါတယ်တဲ့။

နန်းတော်အပြင်အဆင်က အနောက်နိုင်ငံမှ အနုပညာများနဲ့ အာရှရဲ့သာယာလှပတဲ့ ဥယျာဉ်တော်ပေါင်းစပ်လိုက်တဲ့အခါ ခေတ္တနားနေစံမြန်းတဲ့နန်းတော်လေးက သာယာမှုအဖုံဖုံပေါင်းစုံလို့နေပါတယ်။

မမြင်နိုင်တဲ့ ကံတွေကိုပဲ ယိုးမယ်ဖွဲ့ရတော့မှာလား၊ လက်တွေ့ဘဝရဲ့ အားနည်းမှုတွေကိုပဲ သင်ခန်းစာယူရမလားတော့ မပြောတတ်တော့ပါဘူး။

တစ်နေ့တော့ ဒီလိုသာယာလှပတဲ့ နန်းတော်နဲ့ ဘယ်လိုမအပ်စပ်တဲ့ အတိတ်သမိုင်းတစ်ခု ဖြစ်လာပါတော့တယ်။ 
ဘုရင်နဲ့ မိဖုရားတို့ နန်းတက်ပြီး ၂-နှစ်ကျော်ကာလလေးမှာ၊ အသက်၂၀မကျော်လွန်ခင်၊ အချစ်သွေးကြွယ်နေတဲ့အချိန်မှာပဲ ကံကြမ္မာဆိုးက မဖိတ်ခေါ်ပဲ ရောက်လို့လာပါတယ်။

တစ်ခုသောနွေရာသီမှာ မိဖုရားခေါင်ကြီးက ယာယီနန်းဆောင်ကို အပန်းဖြေဖို့ လှေဖြင့် လာခဲ့ရာ လမ်းမှာ တော်ဝင်လှေမှောက်သွားခဲ့ပါတော့တယ်။ ဘုရင်မင်းမြတ်ရဲ့ မြတ်နိုးတော်မူလေသော မိဖုရားကြီးဖြစ်တဲ့အတွက် အလွယ်တကူ ဆွဲကူလို့ဖြင့် မကယ်ဝံ့ကြပါဘူး။ အနားမှာလည်း မင်းချင်းတွေသာရှိပုံရပါတယ်။ လှေမှောက်တာကို အခွင့်ကောင်းယူလို့ မိဖုရားကို စော်ကားတယ်လို့မြင်ရင် မင်းပြစ်မင်းဒဏ်ခံရမှာလည်း ကြောက်ကြလေတော့ မိဖုရားမှာ ကွယ်လွန်အနိစ္စရောက်ရပါတော့တယ်။ ပိုကြေကွဲစရာကတော့ မိဖုရားကြီးမှာ ကိုယ်ဝန်လွယ်ထားရတဲ့အချိန်ဖြစ်ပါတယ်။ မိဖုရားနှစ်သက်တဲ့ နန်းဆောင်အနီးမှာ ကွယ်လွန်သွားတဲ့အတွက် အဲဒီအပန်းဖြေနန်းတော်ထဲမှာ မိဖုရားနဲ့ လူမဖြစ်သေးတဲ့ ကလေးကို မြုပ်နှံသဂြိုလ်လိုက်ကြပါတယ်။

အသက်ငယ်ငယ် ဘုရင်တစ်ပါးအနေနဲ့ သူမြတ်နိုးတော်မူတဲ့ မိဖုရား ဘဝတစ်ပါးပြောင်းသွားတဲ့အဖြစ်က ကြေကွဲစရာ။

ချစ်မြတ်နိုးခြင်းအခြေခံပြီး နန်းတော်ကို မွန်းမံခြယ်မှုန်း၊ ချစ်ခြင်းတရားနဲ့ပဲ ချစ်သူနှစ်ဦး ပျော်စံကြည်နူးခဲ့ကြပြီး အချိန်တိုလေးအတွင်းမှာပဲ ကြေကွဲခြင်းဖြစ်ပေါ်လာခဲ့တဲ့ ဒီနန်းတော်က ဘုရင်ကြီးအတွက် မြတ်နိုးမိခြင်းကြောင့်ပဲ အဆိပ်သင့်ခဲ့လေသလားလို့ ... တစ်ထွာတစ်မိုက်ဥာဏ်လေးနဲ့ တွေးကြည့်မိပါတယ်။

မြတ်နိုးခြင်းတွေကြောင့်တော့ အဆိပ်မသင့်ပါစေနဲ့လားနော် ...။

ခင်မင်လေးစားစွာဖြင့်
ခရစ္စတလ်

Sunday, April 6, 2014

မြန်မာနိုင်ငံမှ ဘဏ်စနစ်များ တိုးတက်ပါစေသား ...။

 facebook မှာ တင်ထားပြီးသားကို ဘလော့မှာ ပြန်တင်ပေးလိုက်ပါတယ်။ ဖဘရဲ့ အားနည်းချက်လား ကိုယ်ညံ့သလားတော့ မသိ၊ ကိုယ်ရေးပြီး အတော်ရှာခက်ပါ့။ blog မှာတော့ ရှာရလည်း လွယ်တယ်၊ အီးမေးနဲ့လည်း သိမ်းလို့ရပါတယ်။ 
ဖဘမှာ မဖတ်ရသေးတဲ့ ဘလော့က မိတ်ဆွေတွေ ဖတ်ဖို့ တင်ပေးလိုက်ပါတယ်။ 
သင်္ကြန်ပိတ်ရက်တွေနဲ့ အားနေလို့ စာလေး ပြန်စီချရေးမိပါတယ် ... :)


ရန်ကုန်ပြန်စဉ်တစ်လအတွင်း တော်တော်များများလေ့လာဖြစ်ခဲ့တယ်၊ ကုန်ဈေးနှုန်းတွေ လစာတွေ၊ စီးပွါးရေးနဲ့ ငွေကြေးဈေးကွက်၊ ခရီးသွားလုပ်ငန်းတွေအကြောင်း အကြမ်းဖျဉ်းလေ့လာခဲ့ပါတယ်။ အဲဒီထဲက CB Bank Easi Travel Prepaid Master Card
အကြောင်းလေး နဲနဲပြောပြပါမယ်။ သိချင်တဲ့သူလည်း မေးထားလို့ပါ။ 







အပိုင်း (၁)
ဘဏ်ကဒ်မှာ Master Card & Visa ကဒ်ဆိုပြီး နှစ်မျိုးရှိပါတယ်။

Master Cardကတော့ မိမိနဲ့ မိသားစု သုံးစွဲလို့ရပါတယ်။ Visa ကတော့ privacy ပိုမြင့်တယ် တစ်ဦးတည်းပဲ သုံးလို့ရနိုင်ပါတယ်။

ကဒ်လုပ်တဲ့အခါ မှတ်ပုံတင်နဲ့ ကဒ်ပြုလုပ်ခ မြန်မာငွေ 8000ပေးသွင်းရပါတယ်။

မြန်မာငွေ ထည့်သွင်းရင် ဒေါ်လာနဲ့ ပမာဏပြပေးပါတယ်။

ဒေါ်လာ 50 မှ 5000 အထိ ပမာဏတူတဲ့ မြန်မာငွေသွင်းနိုင်ပါတယ်။ ပြန်ထုတ်တဲ့အခါ ပေါက်ဈေးနဲ့ ညှိပြီး မြန်မာငွေ ပြန်ရမှာပါ။

အွန်လိုင်းဈေးဝယ်တာနဲ့ နိုင်ငံခြားမှာ သုံးဖို့ ဘဏ်က ရှင်းပြပါတယ်။ ဝယ်လို့မရတဲ့ website တချို့တော့ရှိပါတယ်။

ဘဏ်နဲ့ customer ကြား စည်းကမ်းနဲ့နားလည်မှုစာချုပ် လက်မှတ်ထိုးရပါတယ်။

ကဒ်ကို အသက် ၂၁-နှစ်အထက် ရဟန်းလူပုဂ္ဂိုလ်များ ပြုလုပ်နိုင်ပါတယ်။

ကဒ်နဲ့ အွန်လိုင်းဈေးဝယ်မှုမှာ ဘဏ်ဘက်က exchange rate ကိုပဲ စားမှာဖြစ်ပါတယ်။

ငွေလွှဲခ မဖြတ်ဘူးလို့ဆိုပါတယ်။

အွန်လိုင်းက ဈေးဝယ်တဲ့အခါ confirmation code ကို ပေးထားတဲ့ အီးမေးနဲ့ ထည့်ပေးပြီး ဈေးဝယ်နိုင်ပါတယ်လို့ ဘဏ်က ညီမလေးများက ရှင်းပြပါတယ်။

ကဒ်ပြုလုပ်တာနဲ့ ပတ်သက်ပြီး အဓိက သိသင့်ပြုလုပ်ရမှာတွေဖြစ်ပါတယ်။ 

--------------------------------

အပိုင်း (၂)
ထိုင်းက ဘဏ်တွေအကြောင်း အနည်းငယ် ပြောကြည့်မယ် ....

ထိုင်းမှာ Cyber-banking debit ကဒ် အသုံးပြုတာတောင် အတော်လေး အဆင်ပြေပါတယ်။ တချို့ website တွေ ဈေးဝယ်မရတာတော့ ရှိပါတယ်။

ဘယ်နိုင်ငံမဆို ငွေလွှဲရင် မြန်မာနိုင်ငံမှ အပ သုံးရက်မြောက်ဆို ကိုယ့်အကောင့်ထဲ ငွေရောက်ပါပြီ။ တခြားဘာမှ အမှားအယွင်းမဖြစ်ရင်ပေ့ါ။

Cyber-banking debit ကဒ် နှစ်ခုရှိတဲ့အထဲက ဘဏ်တစ်ခုက ကိုယ့် entry တိုင်းကို ငွေထပ်ဖြတ်ပါတယ်။ ဘာဖြစ်လို့လဲဆိုတော့ အဲဒီကဒ်နဲ့ဆို ကိုယ်သုံးစွဲတဲ့နေရာတွေမှာ ဈေးသက်သာပေးတယ်။ ဆိုလိုတဲ့ သဘောက ဈေးသက်သာချင်ရင် ဒီကဒ်ကို သုံးပေါ့။

ဖုန်းခတွေ ပေးဆောင်တာဖြစ်ဖြစ် ကုန်တိုက်တွေမှာ ဈေးဝယ်တာဖြစ်ဖြစ် ဘဏ်ကဒ်နဲ့ ဖြတ်မယ်ဆို ဘတ်ငွေ1000သုံးစွဲရင် ဘတ်100 ဘဏ်က ပြန်ပေးပါတယ်။
ဒီတော့ customer ဘက်က ကဒ်ထဲ ငွေထည့်ပြီး သုံးတဲ့စနစ်ကို လိုလားစွာ သုံးချင်ကြတာပေါ့နော်။ အမြဲတမ်းပေးနေတာ မဟုတ်ပေမယ့် လတော်တော်များများ ပြန်ပေးလေ့ရှိပါတယ်။

Cyber-banking debit ကဒ်နဲ့ ပတ်သက်ပြီး ဘဏ်တွေက လူအများသုံးချင်အောင် ပုံစံအမျိုးမျိုးနဲ့ ဆွဲဆောင်ကြပါတယ်။
ဝယ်တဲ့နေရာမှာ သူတို့ဘဏ်ကဒ်သုံးရင် ဈေးသက်သာစေနိုင်တာ၊ အွန်လိုင်းမှာ ဈေးဝယ်နိုင်မှု website များများ လက်ခံနိုင်တာတွေ ပြုလုပ်ပေးထားပြီး တခြားတစ်ဘက်က သုံးစွဲသူဘက် အခွန်လေး မသိမသာ ပြန်ကောက်တာလည်း ရှိပါတယ်။

နောက်ဘဏ်တစ်ခုကတော့ website များများတော့ သုံးမရဘူး၊ ဈေးလည်း မသက်သာဘူး၊ ဒါပေမယ့် သုံးစွဲမှုများလေ သူက ဘဏ်ထဲကို ငွေပြန်ထည့်ပေးတတ်တာ၊ နှစ်ကုန် အတိုးပေးတာမျိုးနဲ့ ဆွဲဆောင်ပြန်ရော။

ယေဘူရအားဖြင့်ကြည့်မယ်ဆိုရင် အနည်းအငယ်ဆီတော့ ကွာပေမယ့် အတူတူလောက်တော့ ဖြစ်သွားပါတယ်။ သုံးစွဲသူကို နည်းမျိုးစုံနဲ့ Marketing လုပ်ကြတာ သူတို့ တာဝန်ပဲ မဟုတ်လားနော်။


 ဘယ်ချိန်က ပြည့်သွားလဲ မသိ၊ ကိုယ်တော့ အဲ့ ငါးဆယ်ထဲ မပါ :D
--------------------------------------
အပိုင်း (၃)
ကိုယ့်နိုင်ငံက ဘဏ်တွေဘက် ပြန်လှည့်ကြည့်မိရင် ...

ဘဏ်တွေမှာ လေဝင်လေထွက်မကောင်းပါဘူး။ ဘဏ်ဝန်ထမ်းတွေ ကျန်းမာရေးပိုင်းဆိုင်ရာ ဘယ်လို ဖြေရှင်းကြမယ်တော့မသိပါ။ ငွေစက္ကူများက ထွက်လာတဲ့ မှိုနံ့တွေက ကြောက်စရာပါ။
ဒီကြားထဲ မီးချွေတာ၊ မီးပျက်တာနဲ့ ဝန်ထမ်းတွေကို ဆေးစစ်ကြည့်မယ်ဆိုရင် ... သိပ်မတွေးတာကောင်းပါတယ်လေ ....

ဘဏ်ကဒ်တွေထဲက အနိမ့်ဆုံး ATM ကဒ်ပြုလုပ်မယ်ဆိုကြပါစို့ ...
ATM ကဒ်ပြုလုပ်တဲ့အခါ ချက်ချင်းမရသေးဘူးနော်၊ နောက်ရက်မှ လာယူရမှာတဲ့။
ပြီးတော့ စက်တွေ ၂၄-နာရီတော့ သုံးမရတတ်ပြန်ဘူး၊ ဆာဗာဒေါင်းရင် မရနိုင်ပါဘူးတဲ့လေ။ 


ATM စက်တွေမှာ CB Bank Easi Travel Prepaid Master ဘဏ်ကဒ်ကို ပေးမစစ်သေးပါဘူးတဲ့ permission ပိတ်ထားပါတယ်လို့ပြောလိုက်တယ်။ ကိုယ်သွားတဲ့ စက်မှာ မရဘူးလို့ ဘဏ်က ပြောတာပါ။ တခြားနေရာက စက်တွေမှာ ရနိုင်မလားတော့ မစစ်မိခဲ့တော့ဘူး။Multi-Currrency မသွင်းထားလို့လားမေးတော့ ဘဏ်ဝန်ထမ်းတွေက ခပ်တွေတွေလေး ခေါင်းညိတ်ပြတယ်။ သူတို့လည်း သိပ်သိပုံမရပါ။
 
ATM ကဒ် အားသာချက်ကတော့ ဘယ်မြို့ကပဲ ငွေထုတ်ထုတ် ငွေလွှဲခ မပေးရပါဘူး။ စက်ရှိတဲ့ မြို့တွေမှာသာ ငွေထုတ်လို့ရမယ်။
သုံးစွဲသူအနေနဲ့ ဘယ်မြို့တွေမှာ စက်ရှိနိုင်မလဲဆိုတာ သိဖို့ အထူးလိုအပ်ပါတယ်။
ATM ကဒ်သုံးစွဲသူတွေကို အတိုးတော့ မစားရဘူးတဲ့ သုံးစွဲဖူးသူတွေက ပြောကြပါတယ်။

အခု CB Bank Easi Travel Prepaid Master Card ကို ATM စက်ထဲ ငွေစစ်ကြည့်တော့ ငွေစစ်ခ ပေးရမယ်လို့ စာပေါ်လာတယ်။
(ကျမကလည်း ကပ်စီးကုပ်လေ ပေးပါဘူးပေါ့၊ အဲဒါနဲ့ ထပ်မစစ်ခဲ့တော့ဘူး)။ လိုင်းကနေ စစ်ရင်တော့ မဖြတ်တန်ကောင်းရဲ့။ ကိုယ့် balance လေးတောင် မကြည့်ရဘူးလားမသိ...

ဘဏ်က စာချုပ်မှာ စာရင်းအင်းပညာနဲ့ ပတ်သက်တာတွေကို မြန်မာမှု ပြုရေးသားထားပါတယ်။ ကျမတို့ စာသင်ခဲ့တုန်းက စာရင်းအင်းပညာရပ်ကို အီးလိုသင်ခဲ့ရတော့ ဖတ်ရတာ နဲနဲတော့ စဉ်းစားပြီး ပြန်တွေးရတယ်၊ ဒါကတော့ ကိုယ့်အားနည်းချက်ပါ။

online banking မသုံးဖူးတဲ့သူဆိုရင် အဲဒီစာတွေ နားလည်ဖို့ ကြိုးစားရမယ်။
ဘဏ်ဝန်ထမ်းတွေက အရင်က သုံးဖူးလားလို့ မေးတော့ သုံးဖူးတယ်လို့ ပြောလိုက်လို့လားမသိ စာပဲ ဖတ်ခိုင်းတော့တယ်၊ ရှင်းမပြတော့ဘူး။ ပြီးတော့ လက်မှတ်ထိုးပေးရပါတယ်။

လက်မှတ်ထိုးပေးရတဲ့ စာချုပ်ကို မိတ္တူ မပေးပါဘူး။ တကယ်ဆို စည်းကမ်းတွေနဲ့ စနစ်တွေပါတဲ့ စာရွက်ကို လက်မှတ်ထိုးပေးထားတဲ့ သုံးစွဲသူထံမှာလည်း မိတ္တူရှိသင့်တာပေါ့။
အဲဒါနဲ့ ဖုန်းနဲ့ ဓာတ်ပုံရိုက်လာခဲ့တယ်။ ဓာတ်ပုံရိုက်ရမလားလို့ မေးမနေတော့ဘူး
ရိုက်နေတုန်းက ဘဏ်က ဝန်ထမ်းတွေ မတားကြပါဘူး။

နောက်တစ်ခုကတော့ ကိုယ်သိချင်တာလေး မေးဖို့ ဘဏ်တွေကို ဖုန်းဆက်ရင် HotLine တွေလည်း ဖုန်းကိုင်မယ့်သူမရှိပါဘူး။ အဲဒါနဲ့ ဘဏ်ကို ထပ်သွားရပြန်တယ်၊ ပြည်ပထွက်လာမှ မေးစရာပေါ်ရင် အခက်ဆိုပြီး သိချင်သမျှ မေးဖို့အတွက်ပါ။ ဘဏ်ရောက်တော့ ဖုန်းခေါ်မရတာ မီးပျက်နေလို့ပါတဲ့ တောင်းပန်ကြပါတယ်။

နားလည်ပေးရမယ်လေ ကိုယ့်နိုင်ငံအကြောင်းသိနေသားနဲ့။
ကိုယ့်နိုင်ငံက ခေတ်စနစ်နောက်ကျနေသေးတော့ ဘဏ်တွေ အသုံးပြုရတာ အစစ အထစ်အငေ့ါလေးတွေတော့ ရှိတုန်းပါပဲ။ အခု အနည်းငယ်တိုးတက်ဖွယ်သော စနစ်လေးတွေ ထွန်းကားလာတာကို အနာဂတ်ကောင်းဖို့အတွက် ကြိုဆိုကြရမှာပေါ့။ 


ဘဏ်စနစ်တွေ အများကြီး ထွန်းကားလာရင် စီးပွါးရေးအတော်လေး အဆင်ပြေမယ်။ အခုလည်း တစ်ချို့ တက္ကစီသမားတွေ ဘဏ်နဲ့ ချိတ်ဆက် အကြွေးဝယ်ခွင့်ရနေပါပြီ။ owner ကို ပေးရတာထက် ဘဏ်ကို အချိန်မှန်မှန် ငွေချေနိုင်ရင် အချိန်တန် ကားလေးတစ်စီးပိုင်ခွင့်ရမယ်။ မြေဝယ်ထားပြီး မြေစာချုပ်ပြရင် ဆောက်လုပ်မှုစရိတ်တချို့ ဘဏ်က ထုတ်ချေးပေးနေပြီဆိုတော့ အလားအလာများစွာ အနာဂတ်မှာ ကောင်းပါစေသားလို့ ...။

နောက်တော့လည်း ကောင်းသွားမှာလေလို့ အကြောင်းအရာများစွာကို ဖြေသိမ့်အတွေးတွေ အများကြီးနဲ့ ရန်ကုန်က ခေတ္တ ခွဲခွါခဲ့ရပြန်ပါတယ် ...။

ခင်မင်လေးစားစွာဖြင့်
ခရစ္စတလ်