တရားဦးဓမ္မစင်္ကြာကို တဆင့်နာကြားခွင့်ရသူလေးတစ်ယောက်အကြောင်း

 အပိုင်း(၂)

ဘုန်းဘုန်းရှင်သစ္စာဖြေကြားပြီး ပိုစ့်ရေးပေးတာပါ။ ခရစ္စတလ်မှ ဘုန်းဘုန်းကို မေးလျှောက်တာ ဒီအကြောင်းအရာနဲ့ပါဆို ဒုတိယအကြိမ်မေးလျှောက်ဖြစ်တာပါ။ 

ပထမအကြိမ်တုန်းက ရာဟုရဲ့မာယာရှင်းတမ်း 

ဒုတိယအကြိမ်မှာ ဘုန်းဘုန်း ဖြေပေးတာက ဒီလိုလေးပါ ........ :)

ဝါဆို လပြည့်ညမှာ သားရဟန်းကို ရှာနေခဲ့သော မယ်မယ် ခရစ္စတယ်လ်......း)

ကင်မရာ မြင်ကွင်း (၁)

လေပြေက ညှင်းသွဲ့သွဲ့ လရောင်လဲ့လဲ့ သာနေသော ရာဇဂြိုဟ် ညချမ်း။ လောကသည် ခါတိုင်းထက် သာယာလို့နေသည်။ ဆောင်သဉ္ဇာလေပြတင်းမှာ အမျိုးသမီးတစ်ယောက်သည် ညအလှကို ခံစားလို့…။ စိန်ခြူးကြာညောင် လွမ်းချင်းဖြင့် ထိုင်နေခြင်းတော့ မဟုတ်ပေ။
သူမ၏ စိတ်အစဉ်တို့သည် သောတာပတ္တိအရသာ ဖြင့် ငြိမ်းချမ်းလို့နေသည်။ တင့်တယ်သာယာလိုက်တဲ့ ညခင်း။ သူမနာမည်က ကာဠီ…။

“လေသာပြတင်းမှ မိန်းမပျိုလေး မျှော်ကာငေး”

ဟေမ၀တ နှင့် သာတာဂိရနတ်သားနှစ်ယောက်တို့၏ တရားဆွေးနွေးသံက သူမ အသိဥာဏ်ကို လက်ကနဲ ပွင့်သွားစေသည်။
ဗုဒ္ဓတဲ့… ဂုဏ်တော် ကိုးပါးနှင့် ပြည့်စုံသူ။ မဟာပုရိသ ယောက်ျားမြတ် အင်္ဂါနှင့်လဲ စံမီသူ။ နတ်တကာတို့ထက် မြင့်မြတ်သူ။ သာကိယနွယ်ဖွား သုဒ္ဓေါဒန ရွှေနန်းရှင်ရဲ့သား သိဒ္ဓတ္ထမင်းသားတဲ့…။ လောကမှာ ဘုရားပွင့်လေပြီကော…….။

ဒီနေ့ ၀ါဆိုလပြည့်နေ့ညနေခင်း.. သားသမင်တို့ ခိုလှုံရာ မိဂဒါဝုန်တောမှာ ပဉ္စ၀ဂ္ဂီ တရားကျင့်ဖော်တွေကို တရားဟောတာတဲ့..။ ဓမ္မစကြ်ာ တရားဦး……….။

အစွန်းနှစ်ပါး…

အတ္တကိလမထ (မိမိကိုယ်ကိုယ် ညှင်းပန်းနှိပ်စက်တဲ့ အကျင့်)

ကာမသုခလ္လိကာ နုယောဂ (ကာမဂုဏ်တို့ဖြင့် နစ်မွန်းနေသော အကျင့်)

ထိုအကျင့် နှစ်ပါးကို ပယ်ရမည်တဲ့…။

မဇ္ဈိမ ပဋိပဒါ (အလယ်အလတ် လမ်းစဉ်) ကိုလိုက်ရမည်တဲ့..။

``..သမ္မာ ဒိဋ္ဌိ၊ သမ္မာ သင်္ကပ္ပ၊ သမ္မာ ၀ါစာ၊ သမ္မာ ကမ္မန္တ၊ သမ္မာ အာဇီဝ၊ သမ္မာ ၀ါယမ၊ သမ္မာ သတိ၊ သမ္မာ သမာဓိ…´´

သူမနှုတ်ဖျားမှ ဖွဖွလေး ရွတ်ကြည့်မိသည်။ အိုး ငြိမ်းချမ်းလိုက်သည့် ဖြစ်ခြင်း…။

ဒီတရားကို ကြားနာလိုက်ရကတည်းက သူမ၏ရင်တွင်းမှာ သောတာပတ္တိ အလင်းက ပွင့်သွားခဲ့ပြီ..။
ဘုရားရှင် ရှိရာအရပ်ကို ရည်မျှော်မှန်းပြီး သူမ ဦးသုံးကြိမ် ဦးခိုက်မိတော့သည်။ ညဥ့်လဲ နက်လှပေပြီ..။ သူမ ပြတင်းနားမှခွါ စက်ရာဝင်ဖို့ အထ.. ကမ္မဇလေ လှုပ်တာကို ခံစားရတော့သည်။ သူမမှာ ကိုယ်ဝန် အရင့်အမာနှင့်..။

ကောင်းလိုက်တဲ့ နိမိတ်၊ တင့်တယ် လှပလိုက်သည့် ညချမ်း၊ မွေးလာသည့် သားယောက်ျားလေးကို သောဏ (မောင်တင့်ဆန်း) လို့ နာမည်ပေးမည်ဟု သူမ မှတ်ထားလိုက်တော့သည်။

ကင်မရာ မြင်ကွင်း (၂)

ပျားပန်းခက်မျှ လူအုပ်ကြီးသည် တစ်နေရာသို့ ဦးတည်၍ သွားနေကြသည်။ အမျိုးကောင်းသား တစ်ယောက်လည်း ထိုလူအုပ်ထဲတွင် ပါသည်။ သူတို့ဦးတည်ရာက ပဒုမုတ္တရ ဘုရားရှင်၏ တရားသဘင်သို့..။

``ဧတဒဂ္ဂံ ဘိက္ခဝေ မမ သာဝကာနံ ဘိက္ခူနံ ကလျာဏ၀ါက္ကရဏာနံ ယဒိဒံ……….´´

ပဒုမုတ္တရ ဘုရားရှင်သည် သာဝကတပါးကို ဧတဒဂ်ဘွဲ့ထူးချီးမြှင့်လိုက်သည်။ အမျိုးကောင်း သားလေးသည် အားကျစိတ်တို့ဖြင့် နာယူလျှက်ရှိသည်။ သူလဲ ထိုဘွဲ့ထူးမျိုးကို ရယူချင်သည်။ အလှူဒါနကြီးကို သူပြုလုပ်သည်။ ဘုရားရှင်ကို သူပြုစုလုပ်ကျွေးသည်။ ဘုရားရှင်ထံမှာ သူဆုတောင်းသည်။

ဘုရားရှင်က `` နောင်ပွင့်လတ္တံ့သော ဂေါတမ ဘုရားရှင်လက်ထပ်တော်၌ စကားအရာချိုသာ လိမ္မာသော ဘွဲ့ထူးကိုရပေအံ့´´ ဟု ဗျာဒိတ်တော် စကား မိန့်ကြားခဲ့သည်။

ကင်မရာ မြင်ကွင်း (၃)

ဇေတ၀န်ကျောင်းတော်..။ ဂေါတမ ဘုရားရှင်၏ မေတ္တာတရားရိပ်၊ တရားဓမ္မသံတို့ဖြင့် မဆိတ်တဲ့ ဘူမိနတ်သန်..။ ညနေချမ်း…။

ရဟန်းတစ်ပါးသည် ဖလသမာပတ်မှထကာစ ကိလေသာမြူ ကင်းစင်လျှက် တက်သစ်စ လ၀န်းပမာ ထွန်းပလျှက်ရှိသည်။ ရဟန်း၏ ဘွဲ့တော်က သောဏ မထေရ်..။

သူ့ဘ၀အစ…။

သူ့အိမ်ကို ဆွမ်းခံကြွနေကျ ဆရာ မဟာ ကစ္စာန မထေရ် ထံမှာ သူရဟန်းပြုခဲ့သည်။ သုံးနှစ်..၊ ၀ိပဿာတရား ပွားများပြီး အရဟတ္တဖိုလ် အောင်ပန်းကို သူဆွတ်လှမ်းနိုင်ခဲ့သည်။ ဆရာ့ခွင့်ပြုချက်ဖြင့် သူ ဇေတ၀န်ကျောင်းတော်ကို ထွက်လာခဲ့သည်။ ဘုရားရှင်ထံမှာ ဒသဗလ တရားနာကြား ဖို့..။

``သားရဟန်း ဘုရားထံကြွရောက်မည်ဆိုလျှင် ဤကမ္ဗလာကို ယူဆောင်သွားပါ၊ ဘုရားရှင်နေတဲ့ ဂန္ဓကုဋီမှာ ဖြန့်ခင်းပူဇော်ပါလေ´´

သောတာပန်ဖြစ်သော သူ့မယ်မယ် မှာတမ်း။ သူမြေ၀ယ်မကျ နားထောင်ခဲ့သည်။ သို့အတွက် သူ့နာမည်နောက်မှာ ကုဋိကဏ္ဏ ဆိုတဲ့ဘွဲထူးတစ်ခုတိုးပြီး သောဏကုဋိကဏ္ဏ ဟု တွင်ခဲ့သည်။

ဘုရားရှင်၏ အင်္ဂါရှစ်ပါးနှင့်ပြည့်စုံတဲ့ အသံတော်၊ လူတကာ နားမှာ ချိုသာလှတဲ့ အသံတော်တို့ဖြင့် တရားဟောဟန်ကို သူ အားကျသည်။ သူသည်လည်း ဝေနေယျတို့ကို တရားဟောလျှင် အသံတော်ကြည်ရှရှ သကာပျားတမျှ ချိုသာတဲ့ အသုံးအနှုန်းတို့ဖြင့် သူဟောသည်။

ဂေါတမ ဘုရားရှင်က သူအား…

``ဧတဒဂ္ဂံ ဘိက္ခဝေ မမ သာဝကာနံ ဘိက္ခူနံ ကလျာဏ၀ါက္ကရဏာနံ ယဒိဒံ သော ဏော ကုဋိကဏ္ဏော´´ ဟူ၍ ပရိသတ် အလယ်တွင် သူ့ကို ချီးမြှင့်ပေးသနားတော်မူသည်။

``စကားအရာ ချိုသာလိမ္မာသောသူ´´

ဘုရားနှုတ်တော်မှ ထုတ်ဖော် မြွတ်ဟတဲ့ အမြင့်မြတ်ဆုံးဆု။ သူ့အတွက် ဒီထက် ကောင်းတဲ့ အရာမရှိတော့..။
(ဟေမ၀တ သုတ်နှင့် သောဏကုဋိကဏ္ဏတ္ထေရ၀တ္ထု)


စီစဉ်သူ။......... ခရစ္စတယ်လ်
ဇာတ်ညွှန်း။............ ဓမ္မဂင်္ဂါ
ဒါရိုက်တာ။............ ရှင်သစ္စာ
ရိုက်ကွင်းတာဝန်ခံ။.......... ဇူကာဘက် ...........း)း)


ဘုန်းဘုန်းဓမ္မဂင်္ဂါ ကို ခရစ္စတလ်ရဲ့အမျိုးသားက မစိုးရိမ်အလွမ်းများ ပိုစ့်တွေကို ညွှန်းလို့ ဖတ်မိရာမှ စတင်သိရှိခဲ့တာဖြစ်ပြီး၊ ဘုန်းဘုန်းရှင်သစ္စာကိုတော့ ဝိမုတ္တရသမှာ အခြားသောဓမ္မလင့်များမှ ပိုစ့်အသစ်များတင်ပေးတုန်းက (ဓမ္မလင့်တိုင်းကို ဖတ်လိုက် တင်လိုက် လုပ်ခဲ့တုန်းက) သိခဲ့တာဖြစ်ပါတယ်။

နောင်များမှာလည်း တပည့်တော် မသိသေးတာ မေးလိုတာများရှိရင် မေးလျှောက်ပါအုံးမယ်ဘုရား။
အခုလိုတပည့်တော် သိချင်တာလေးကို သေသေချာချာဖြေပေးတာကိုလည်း အထူးကျေးဇူးတင်နေမိပါတယ်ဘုရား။ ဒီနေ့မှာ တပည့်တော်မွေးနေ့ဖြစ်လို့ မွေးနေ့ အမှတ်တရပိုစ့်ရေးပေးတယ်လို့ သဘောထားလိုက်ပြီနော် ..... :)

“ဘဝရဲ့စာမျက်နှာများ” ကို အလည်လာတဲ့သူအားလုံးကို ထပ်ဆင့်မျှဝေပေးလိုက်ပါတယ်။


ခင်မင်လေးစားစွာဖြင့်
ခရစ္စတလ်