သတ္တဝါအပေါင်း စိတ်ချမ်းသာ၊ ကိုယ်ကျန်းမာကြပါစေကြောင်း ဆုတောင်း မေတ္တာပို့သပါတယ်.........

Thursday, March 31, 2011

ရှေ့မျက်နှာရှေ့ထားလို့ တောင်းပန်လိုက်ပါတယ်...

ခရစ္စတလ်သည် နမော်နမဲ့နိုင်သူ တစ်ယောက်ဖြစ်၏
စီးပွါးရေးကတစ်ဘက် အင်တာနက်က တစ်ဘက် မနိုင်မနင်း လောဘကြီးသေး၏။
လောဘနဲ့ မောဟကို ဟာမိုနီဖြစ်ဖို့ အလုပ်မအားတတ်တဲ့အခါ ပိုစ့်လေးတွေ တက်နေဖို့
schedule ဖြင့် ပိုစ့်တင်တဲ့ အကျင့်ကလည်း ရှိသေးပြန်၏။

ထိုထိုသော အကြောင်းများ စုပေါင်းကာ ယနေ့တွင် မျက်နှာပူစရာ အမှားကြီးဖြစ်လာပါတော့သည်။
အခုတလော အလုပ်က ပိုမအား၊ ပိုစ့်က အချိန်ကိုက်လုပ်ပြီးသား
ပိုစ့်ကိုလည်း ရေးလက်စ၊ တင်ဆက်ပုံကိုလည်း စဉ်းစားနေဆဲ
ညနေပိုင်း ဧည့်သည်နဲ့ စကားပြောချိန်ခဏလေးမှာ စက်ပိတ်ထားမိတော့ ပိုစ့်တက်လာတာကို အသိလိုက်ဘူး၊
အယ် ....တော့ လူတွေက ပိုစ့်ကို တက်ကြည့်နေကြပြီ၊
ဟင့်...... မျက်နှာပူထာနော်၊ တောင်းပန်ပါ၏၊

နောက်ကို ဆင်ခြင်ရပါအုံးမည်၊ သတိထားရပါအုံးမည်။
ဒီတောင်းပန်စာလေး ရေးနေချိန်တောင် ဖုန်းသုံးခါပြောလိုက်ရသေးပါတယ် ဟင်းးးးးး။
စာဖတ်သူအပေါင်းတို့ စာနာသနားခွင့်လွှတ်ပေးဖို့ကို မျှော်လင့်နေပါတယ်ဟုသာ......။


လေးစားစွာဖြင့်
crystal

google မှ ပုံလေးတွေ ရှာထားပါတယ် :P

Wednesday, March 30, 2011

ငလျင်ဒဏ် ခံစားနေရသော မြန်မာပြည်သူတွေကို ကူညီကြမည်။


အလှူအတွက် အားတက်သရော လှူဒါန်းကြမယ်လို့ သိရတဲ့အတွက် အတိုင်းမသိဝမ်းသာမိပါတယ်။ ငလျင်ဒဏ်သင့်သူတွေကိုယ်စား လှူဒါန်းမယ့်သူတွေကို ကျေးဇူးအရမ်းတင်ကြောင်း ကျွန်မဦးစွာပြောလိုပါတယ်။ တာချီလိတ်မြို့လောက်ပဲ ထိုင်းဘဏ်ကို အဓိကထား သုံးစွဲကြပါတယ်။ ဒါပေမယ့် နိုင်ငံရပ်ခြားက လှူဒါန်းလို သူတွေအတွက် ထိုင်းဘဏ်တစ်ခုခုကလွှဲရင် ပိုမြန်၊ ပိုအဆင်ပြေလိမ့်မယ်လို့ ထင်ပါတယ်။
အောက်ပါ ထိုင်းဘဏ်သည် ငွေလွှဲနိုင်တဲ့အကောင့်ဖြစ်ပါတယ်

Bank - SIAM COMMERCIAL BANK PUBLIC COMPANY LIMITED. THAILAND.
NAME - MISTER U MYINT LWIN
A/C No. - 636-215770-1

ရရှိတဲ့ငွေတွေကို လှူဖို့ဘယ်လို အစီအစဉ်ရှိလဲလို့ မေးမြန်းလာသူတွေကို အကြမ်းဖျင်း (လိုအပ်တာကို ဦးစားပေးပြီး) တွက်ချက်ပါတယ်။ ဒါကလဲ ငလျင်ဒဏ်သင့်သူတွေ လိုအပ်မယ်ထင်တဲ့အရာတွေကို ကိုယ်တိုင်သွားရောက် ကူညီခဲ့တဲ့ စိုင်းရဲ့မျက်မြင်ကိုယ်တွေ့တချို့ပါ။

အဲဒီဒေသမှာ အဓိကလိုအပ်နေတာက သောက်သုံးရေ၊ မိုးကာ၊ ရွက်ဖျင်၊ စားနပ်ရိက္ခာတွေပါ။ တကယ်လို့ ရေတွေကြည်လာပြီဆိုရင် ရေကိစ္စက ပြီးသွားပါပြီ။ နောက် တခြားလှူဒါန်းသူတွေကြောင့် အမိုးအကာတွေ လုံလောက်ပြီဆိုရင် နေအိမ်အတွက် ကျွန်မတို့လှူဒါန်းနိုင်ပါတယ်။ အိမ်တော်တော်များများ၊ ဘုန်းကြီးကျောင်း တော်တော်များများလည်း ပြိုပျက်သွားတဲ့အတွက် ယာယီအိမ်၊ ကျောင်း၊ တတ်နိုင်ရင် တတ်နိုင်သလို လှူဒါန်းဖို့ အစီအစဉ်ရှိပါတယ်။ အလှူငွေ ကောက်ခံရရှိတဲ့အပေါ်မူတည်ပြီး ဒာလှူကကြီးသင့်သလို ကြီးသွားမှာပါ။ အဓိကလှူဒါန်းဖြစ်မယ့်နေရာက ဝေးခေါင်ပြီး လူသူအရောက်နည်းတဲ့ နေရာဖြစ်ပါတယ်။

လှူဒါန်းမယ့်သူရှိပြီဆိုရင် တာချီလိတ်မြို့က စက်အား၊ လူအားနဲ့ကူညီမယ့်သူတွေက အဆင်သင့်ရှိနေပါတယ်။ လှူဒါန်းရရှိတဲ့ငွေတွေကို နေ့စဉ် Update ဖော်ပြသွားမှာပါ။ အလှူဖြစ်မြောက်ဖို့အတွက် လိုအပ်တဲ့ အကြံဉာဏ်တွေကိုလည်း ပေးနိုင်ကြပါတယ်။
အားလုံး ကျေးဇူးတင်ပါတယ်...

နိုင်းနိုင်းစနေ
မနိုင်းဆိုဒ်မှ ကူးယူဖေါ်ပြပါသည်။


ငွေကို နိုင်ငံရပ်ခြားမှ ထိုင်းနိုင်ငံကို တဆင့်လှူဒါန်းမည်ဆိုလျှင်

Bank - SIAM COMMERCIAL BANK PUBLIC COMPANY LIMITED, THAILAND.

NAME - MISTER U MYINT LWIN

A/C No. - 636-215770-1


SIAM COMMERCIAL BANK's
Swift Code: SICOTHBK

သျှမ်းသံတော်ဆင့်အဖွဲ့တွေမှလည်း အကူအညီတွေ သွားရောက်ဆောင်ရွက်နေကြောင်း သတင်းဌာနမှ ကြေညာသွားပါတယ်။

နဲသည် များသည် အဓိကမထားပဲ မြန်မာပြည်သူများကို စာနာသောစိတ်ထားဖြင့် ပါဝင်ကူညီကြပါလို့ တိုက်တွန်းပါရစေရှင်။


လေးစားစွာဖြင့်
crystal

Tuesday, March 29, 2011

“ဆေး”မိသွားတယ်....


“ဆေးမိနေတာ၊ ဆေးမိနေလို့ တန်းတန်းစွဲဖြစ်နေရသလား”စသော စကားလုံးများသည် အများအားဖြင့် အမျိုးသမီးအများစု ပြောလေ့ရှိကြပြီး ပြောကြသည့် အကြောင်းအရာများကလည်း ဖောက်ပြန်မှုတစ်ခုကို အခြေပြုလို့ အများအားဖြင့် ပြောဆိုကြလေသည်။ ချစ်သူ သို့မဟုတ် အိမ်ထောင်ရှိသော အမျိုးသားတစ်ဦးဦး သည် နောက်ထပ်အသစ်လေးများသို့ ခြေလှမ်း များခြင်း ဖြစ်ပွါးလာပြီဆိုရင်တော့ ဤသို့ ပြောဆိုမှုများ ပြုကြလေပြီ။ ထိုစဉ်က ယင်းအပြောအဆိုများကို မိမိနှင့် တိုက်ရိုက် သက်ဆိုင်ခြင်းလည်းမရှိ၊ တဆင့်စကားနဲ့ ကြားရတာမျိုးဆိုတော့လည်း အလေးအနက်ထား ခွဲခြမ်းစိတ်ဖြာ မတွေးမိ၊ မစဉ်းစားမိ ကြား ပျောက် သာ ဖြစ်ခဲ့ပါသည်။ သို့သော် ထိုစကားလုံးများနှင့် ပတ်သက်ပြီး ကျမ၏ဘဝတွင် သုံးကြိမ်တိုင်တိုင် အနီးကပ် ကိုယ်တွေ့ မြင်ရသိခွင့်ခဲ့ရသော အဖြစ်အပျက်တို့ သိခွင့်ချိန်သို့ တနေ့တော့ ရောက်ရှိလာခဲ့ပါသည်။
ဆေးမိတယ်ဆိုတာ ဘာကို ပြောတာလဲ၊ ဆေးမိတယ်ဆိုတာ အမျိုးသားများသာဖြစ်သလား၊ အမျိုးသမီးတွေမှာရော မဖြစ်ဘူးလား၊ ဘာဆေးမိတာလဲ၊ ဆေးမိသွားတော့ ဘာတွေဖြစ်လဲ၊ နောက်ဆက်တွဲအကျိုးဆက်တွေက အကောင်းတွေလား အဆိုးတွေလား။
ဘာတွေက ဘာတွေဖြစ်မလဲ.......။

ဆယ်တန်းစာမေးပွဲအောင်စာရင်းတို့ ထွက်ပြီးချိန်၊ နိုင်ငံတော်အစိုးရ၏ စေတနာများကြောင့်  တက္ကသိုလ်မတက်ခင် ခေတ္တအနားယူအပန်းဖြေနေသော အချိန်ကာလတခုမှာ.......

နှင်းဆီပန်းပွင့်တွေထဲမှာ အနီရဲရဲ စိုနေအောင်လှတဲ့ နှင်းဆီပန်းကို ကြိုက်တာ၊
အရာရာကို ပွင့်လင်း သွက်လက်ချက်ချာနေသော မိန်းမငယ်လေးတစ်ဦး၊
အဘိုးအဘွားများကြောင့် လောကမှာ သူမ အလိုရှိရာမှန်သမျှကို တောင့်တစရာမလိုအောင် ရရှိနေသူ၊
နေမင်းလို တောက်ပလိုသူ၊ လရောင်ကို မုန်းသူ၊
အသံသြရှရှနှင့် စကားလုံးတိုင်းက အမိန့်သံအပြည့်နဲ့ ပြောတတ်သူ၊
သူမပတ်ဝန်းကျင်ရှိ ကာလသားများအကြားတွင် ရေပန်းစားနေတာကို အကျေနပ်ကြီး ကျေနပ်နေသူ၊
စိတ်ဓာတ်မာကြောသလောက် သူမ လက်ဖဝါးလေးတွေက နူးညံ့လှပနေသူ၊
အရာရာကို မြုံစိစိနဲ့ ပျော့စိပျော့ဖတ်နိုင်လှသော ကျမကို အားမရကာ ကြည့်မရသူ၊
သူမအမည်က နှင်းဆီတဲ့။

ကျမနဲ့ နှင်းဆီတို့ (၅)တန်းမှ (၁၀)တန်းအထိ အတူ တစ်ကျောင်းတည်း တက်ခဲ့သော်လည်း သူငယ်ချင်း အရင်းများ မဟုတ်ခဲ့ပါ၊ သို့သော် သူငယ်ချင်းအရင်းများထက် ပိုပြီး စိတ်ခြင်းတော့ နီးစပ်ခဲ့ပါသည်။
(၅)တန်းတက်ရန် ရန်ကုန်မြို့ရှိ အထက်တန်းကျောင်းသို့ ပြောင်းလာသော ကျမနှင့် မြို့ကြီးသူ သူမတို့သည် စာသင်ခန်းထဲတွင် အတူ စာသင်ကြားခဲ့ပါသည်။ သူမ၏ အမုန်းစတင်သောနေ့မှာ သင်္ချာဆရာမက ကျောက်သင်ပုန်းတွင် ထွက်၍ နှင်းဆီအား သင်္ချာတစ်ပုဒ် တွက်ခိုင်းပြီး သင်္ချာပုစ္ဆာအမှားအမှန်ကို  ကျမကို စစ်ဆေးခိုင်းကာ အမှားကို ရှာခိုင်းရာမှ စတင်လေသည်။ အမှန်တော့ အတန်းထဲတွင် သူမသည် စာအလွန်တော်သူ တစ်ယောက်ဖြစ်ပါသည်၊ ယခုပုစ္ဆာမှာ သူမှ ရှန်းလို့ မှားခဲ့ခြင်းသာဖြစ်ပါ၏။ ကျမကို အစအဆုံးတွက်ခိုင်းလျှင်တောင်မှ ကျမ တွက်တတ်မှာမဟုတ်၊ သူမကတော့ အဖြေထွက်ကာနီး မှားသွားခဲ့ပါသည်။ သို့သော် သူမသည် ကျမကို သူ့အမှားအား ထောက်ပြသူအဖြစ် မုန်းသွားလေသည်။ ကျမကလည်း သူအဲဒီလောက် မုန်းသွားမှန်း လုံးဝမသိခဲ့ပါ။ သိခဲ့ရတဲ့အချိန်တောင်မှ လွန်ခဲ့ငါးနှစ်ခန့်ကမှ သူမကိုယ်တိုင် ပြောမှ သိသူဖြစ်ပါတယ် (အဲဒီလောက်ကို ကျမကလည်း တော်ပါတယ်)။ ထို့နောက် တစ်ပတ်အတွင်း သူမ၏ အမုန်းကို အကောင်အထည်ဖေါ်ဖို့ ကံကြမ္မာက ဖန်လာခဲ့ပါသည်။ 

ကျမတို့ စာသင်ခန်းထဲတွင် နှင်းဆီတို့ သူငယ်ချင်းတသိုက်သည် မူလတန်းကျောင်းကတည်းက ကျောင်းအတူတက်ခဲ့ကြတာဖြစ်လို့ အုပ်စုအတောင့်ဆုံးဖြစ်ပြီး၊ ကစားချိန်များတွင် သူတို့ အုပ်စုသာ သီးခြားကစားလေ့ရှိကြပါတယ်။ ကျမတွင်တော့ သူငယ်ချင်းက နှစ်ဦးသာရှိပြီး ဥာဏ်ရည်ချိ့တဲ့နေသည့် သူငယ်ချင်းကျောင်းသူတစ်ယောက်အပြင်၊ ကျမ၏ အခင်ဆုံး သူငယ်ချင်းမှာ ကလေးဇာတ်ဝင်ခန်းများစွာ ရိုက်ကူးနေသော ကလေးသရုပ်ဆောင် သူငယ်ချင်းမလေးဖြစ်ပါသည်။ သူမဇာတ်ကားရိုက်ကူး သွားနေချိန်တွင် ဥာဏ်ရည်မမီသော အခြားသော ကျောင်းသူများက ဝိုင်းပယ်ထားသည့် သူငယ်ချင်း ကျောင်းသူမလေး “ရီရီ”ကို အဖော်လုပ်ကာ ကျမတို့ နှစ်ဦးသာ ကစားလေ့ရှိပါတယ်။ 
ကံကြမ္မာဖန်လာသော တစ်နေ့မှာ ကျမရဲ့ သူငယ်ချင်း မင်းသမီးလေး မရှိခိုက် ကျမနဲ့ရီရီတို့ နေ့လည် မုန့်စားဆင်းချိန် ကစားကြတာပေါ့၊ နှင်းဆီတို့ အုပ်စုအနားတွင် စိန်ပြေးတမ်းကစားရင်း ကျမ က ရီရီ ကို မိသွားလေပြီ။ ရီရီ က ငြင်း ကျမက သူအင်္ကျီကို နောက်မှ ဆွဲကာ မိပြီလို့ အော်၊ သူနဲ့ ကျမကြားတွင် စာရေးခုံတစ်ခု ခံနေပြီး ကျမတို့ နှစ်ယောက် တွန်းဆွဲနေချိန် ခုံက အလိုက်သင့် လှုပ်နေ၊ ကျမက ရအောင် အင်္ကျီကို ဆွဲပြီး ကျောကုန်းကို လှမ်းပုတ်ချိန် ရီရီက နောက်ပြန်အလှည့် ခုံက အလှုပ်နှင့်။

“ရီရီ ကို ပါးရိုက်လိုက်တာ ငါတို့မြင်တယ်၊ နင့်ကို ဆရာမနဲ့ တိုင်ပြောမယ်” နှင်းဆီထံမှ အသံထွက်လာခြင်း ဖြစ်ပါသည်။ သို့နှင့် အတန်းပိုင်ဆရာမနဲ့ တိုင်ပါတယ်၊ ရီရီ က ငိုလို့၊ ကျမက အကြောင်သား၊ နှင်းဆီတို့ အုပ်စု တစ်ခုလုံးက ရီရီ ကို ပါးရိုက်လိုက်တာ သမီးတို့အားလုံးမြင်သတဲ့ ဆရာမရှေ့မှာ။ အများနဲ့ တစ်ယောက်။ ဘာတွေများဖြစ်ကုန်ပါလိမ့်ဆိုတာ ကျမ တကယ့်ကို မသိခဲ့ပါ။ ဆရာမကလည်း အံ့တွေ သြလို့၊ အေးအေးဆေးဆေးနေတတ်တဲ့ကလေးက သူများ ပါးရိုက်ရတယ်လို့ ထင်ကို မထင်ဘူးတဲ့ အဲလိုပြောပြောပြီး ဆရာမက ဆော်ပလော်တီး၊  ဆရာမကတဆင့် အမေကို တိုင်၊ အိမ်ပြန်ရောက်တော့ အမေက ထပ်ဆင့် ဆော်ပလော်တီး။ ကျမက ငို၊ ငိုတာ မကြားရက် မျက်ရည်ကျတာ မမြင်ရက်တဲ့ အဖေက မနေနိုင်တော့ သမီးလုပ်သူက ချော့မေးတယ် အဖြစ်အပျက်စဆုံးကို မျက်ရည်ကြားက ပြောပြ။ အဖေက အမေ့ကို သမီး ပေါင်းနေတဲ့ သူငယ်ချင်းတွေရဲ့ အခြေအနေအာလုံးကို လေ့လာဖို့ တာဝန်ပေးလိုက်တယ်။ အဖေက ပြောတယ် သမီး တိတ်တိတ် သမီးမမှားဘူး၊ နောက်ကို သတိထား ကိုယ့်အမှားမဖြစ်အောင် နေတတ်ဖို့ လိုသတဲ့။ ကျမရဲ့ အိမ်မှာ ကျမ အမှား မဟုတ်တာကို သက်သေထူသူက အဖေဖြစ်ပြီး၊ ကျောင်းမှာ သက်သေထူသူက ကျမရဲ့ သူငယ်ချင်း မင်းသမီးဖြစ်ပါ၏၊ သူမရောက်လာတော့ ကျမက ဇာတ်စုံခင်းပြပါတယ်။ သူမက ကျမလက်ကိုဆွဲလို့ အတန်းပိုင်ဆရာမဆီကို ခေါ်ပြီး အဖြစ်မှန်ကို သွားပြောပေးပါတယ် ဒီလိုနဲ့ အတန်းထဲမှာ အများအမြင် အမှားစင် သွားပါတယ်။ သို့သော်လည်း နှင်းဆီရဲ့ အမုန်းတွေကတော့ မစင်ခဲ့ပါဘူး။ တစ်နှစ်ပြီး တစ်နှစ် ကျောင်းတွေတက် နှင်းဆီတစ်ယောက် ကျမကို ဘာတွေ မကျေနပ်နေမှန်းမသိ၊ ကျမကတော့ သူမရဲ့အရာအားလုံးကို ဗြောင်ဖွင့်ပြောကာ အားကျ နေသူ။ 

ဆယ်တန်းစာမေးပွဲအောင်စာရင်းထွက်လာတော့ (၈)တန်းတုန်းက ငါးဘာသာဂုဏ်ထူးထွက်တဲ့ နှင်းဆီ စာမေးပွဲ ကျတယ်တဲ့၊ ခြစ်ချတာ၊ သူလိုချင်တဲ့လိုင်းမရလို့။ အင်း ကောင်းလိုက်တာ၊ ကျမလည်း ခြစ်ချမိခဲ့ရင် ကောင်းမှာလို့ အဲဒီတုန်းက တွေးမိသေးတယ်။ ကျမက တက္ကသိုလ်တက်ဖို့ စောင့်ရင်း သူမက ဆယ်တန်းစာမေးပွဲကို နောက်တစ်ခါတောင် ဖြေပြီးချိန် ဒီအချိန်မှာ တခါမှ မကြားဖူးသော စကားနှင့် မထင်မှတ်ထားသော အဖြစ်အပျက်တို့ကို ကြားခဲ့ရပြီ။

မေမေ ကိုလတ်(အစ်ကို ဆရာဝန်) ဘယ်သွားတာလဲဟင်

ဟေ သမီး မသိသေးဘူးလား သမီး သူငယ်ချင်း “နှင်းဆီ” မုဒိမ်းကျင့်ခံလိုက်ရတယ်လေ၊ 
ဆေး-မိသွားလို့ ဆိုလားပဲ၊ အဲဒါ သမီးအစ်ကိုဆီမှာ ဆေးလာစစ်ကြတယ်၊ 
အခု ရဲစခန်းမှာ သက်သေထွက်ဆိုဖို့ အခုသွားတာ...

ဆေး-မိသွားတယ် ဆေးမိလို့ မုဒိမ်းကျင့်ခံရတာ....အဲဒါ ဘာကိုပြောတာလဲဟင်...။

ဆေးမိတာလေးတွေနဲ့ ပတ်သက်ပြီး comment မှာ ရေးပေးပါလို့ တောင်းပန်ရင်း
ဒီတခါတော့ တိတ်တိတ်လေး လှည့်ပြန်မသွားကြေး။


လေးစားစွာဖြင့်
crystal

ဆက်လက်ဖေါ်ပြပါမည်.... 

Wednesday, March 23, 2011

ရှည်ကြောလိုက်တာအေ ........။

ဟင် ရှည်ကြောအုံး ..............ဒေါက် ဒေါင် 
သြော် ညည်းတော်တော် လျှာရှည်နေတယ် လာခဲ့ .........အိုး အီးးးးးးးးးး။

ပထမ ဒေါက် ဒေါင် က အစ်ကိုကြီးက ကျမ ခေါင်းကို ခေါက်လိုက်တာ
ဒေါင်ကနဲတောင် မြည်ဟီးသွားတယ်။

ဒုတိယ အိုး အီးးးး က အမေ ကျမကို ဗိုက်ခေါက်လိမ်ဆွဲတာက... တပြိုင်တည်းပင်။

အကြောင်းကား ဤသို့တည်း။ 

လွန်ခဲ့သော (၇)နှစ်ခန့်က တခုသောရုံးဖွင့်ရက်တွင် ကျမ၏ အိမ်ထောင်သည်အစ်မတွေထဲမှ အစ်မ တစ်ယောက် ဖုန်းဆက်လာပြီး ရုံးပိတ်ရက်တွင် သူလာမည့်အကြောင်းနှင့် တိုင်ပင်စရာရှိကြောင်း ဖုန်းဆက်၏။ စိတ်ထဲမှာတော့ အနည်းငယ် ဆန်းနေသယောင် ယောင်။ အမယ် ထူးထူးဆန်းဆန်း ငါ့များ လူရာသွင်းလို့ တိုင်ပင်မယ်ဆိုပဲ။ ဟုတ်ပါ့ မိသားစုထဲ အမျိုးတွေထဲမှာ အငယ်ဆုံးမို့ လူရာသိပ်သွင်းလှတာ မဟုတ်။ ကိုယ့်အလုပ်ထဲမှာသာ လူလူသူသူလုပ်နေတာ အဟတ်။ 

ကိုင်း ရုံးပိတ်ရက်ရောက်ပြီဆိုပါတော့....။ အစ်မတစ်ယောက် အိမ်ရောက်လာခါ ကျမကို လက်အသာ ကုတ်လို့ အိပ်ခန်းဆီကို ဆွဲခေါ်သွားပြီး ဖြစ်ကြောင်းကုန်စင်ကို လင်းပါတော့တယ်။ အကြောင်းကတော့ ကလေးနှစ်ယောက်မိခင်ဖြစ်တဲ့ အစ်မ တစ်ယောက် သားဆက်ခြားဆေးများနဲ့ ဘယ်လိုမှ မတည့်တဲ့အတွက် ခေါင်းပူနေကြောင်း၊ သားကြောဖြတ်ဖို့ကိုလည်း မလုပ်ချင်၊ သားအိမ်ထဲ ပစ္စည်းထည့်တဲ့နည်းကိုလည်း ကြောက်ပါသတဲ့.။ 
(ကလေးနှစ်ယောက် အမေကများ ဒါလေး ထည့်တာကြောက်ရတယ်လို့ အဟိ ပြောကို ပြောချင်ဘူး။)

“အကြံပေးစမ်းပါအုံး ငါ့ညီမရယ်၊ အဲဒါ မမဘယ်လိုလုပ်ရမလဲ ညီမလေးက ဒီအလုပ်တွေနဲ့ ရင်းနှီးနေတော့”
“တီပုံစံ အချောင်းလေး သွင်းတာက သုံးနှစ်ခံတယ်၊ ကလေးအမေတွေနဲ့ သင့်တော်တယ်၊ ပစ္စည်းထည့်တာက ကလေးတစ်ခါမှ မမွေးဖူးသေးတဲ့သူတွေအတွက်သာ မသင့်တော်တာပါ၊ ဘာမှမကြောက်နဲ့၊ နောက်ဆုံးဘာမှ အဆင်မပြေရင်တော့ ကွန်ဒုံးသာ သုံးပေတော့”
“ဟဲ့ဘယ်ဖြစ်မလဲ ဒါလည်း မဖြစ်ဘူး မမ ယောက်ျားက မသုံးချင်ဘူးတဲ့ ဖီးပျက်လို့တဲ့၊ ငါ့ညီမလေးက အပျိုဆိုတော့ ဒါတွေ ဘယ်သိမလဲ”
“အင် ဒုတ်ခေါ ဒါဆို အပျိုဆရာဝန်မလေးတွေ နက်စ်မလေးတွေရော ဘယ့်နှယ်လုပ်ကြမတုန်း ခက်ပြီ၊ ကိုင်း မပြောမပြီး မတီးမမြည်မို့ ပြောလိုက်မယ် အဆင်ပြေစေသတည်းးးးးးးးးးးးး”။ 
အဲဒီနေ့က မင်္ဂလာဈေးကို သွားပြီး စတော်ဘယ်ရီ တစ်ဗူးဝယ်ပေးလိုက်တယ်၊ လိုအပ်ရင် ဖုန်းဆက်မေးဖို့ အစ်မကို မှာလိုက်တယ်၊ အဆင်ပြေချင်တော့ အစ်မ ယောက်ျားက ညနေ သူ့မိန်းမကို ကျမတို့အိမ်မှာ လာကြိုတယ်၊ ညီမအစ်မနှစ်ယောက်သား ဇာတ်အမြန်တိုက်ပြီး ဧည့်ခန်းထဲမှာ ဒီလို ဒီလို....။

အစ်မသည် စာအုပ်တစ်အုပ်ကို ဖတ်ခါ 
“ဟယ်တော့ ကွန်ဒုံးနဲ့ သားဆက်ခြားမယ်ဆိုရင် ဆေးဥပဒ်ဖြစ်စေတာကို ကျော်လွှားနိုင်ဆိုပဲ”
“အမှန်ပေါ့ မမရေ ခင်ပွန်းသည်တွေ ကိုယ့်အမျိုးသမီး အိမ်သူသက်ထားကို တကယ်မြတ်နိုးတတ်တဲ့သူဆိုရင် ဒီလိုကိစ္စတွေက အစ လိုက်စဉ်းစားပေးတတ်ကြတယ်လေ၊ လစဉ်သောက်နေကျဆေးတွေက ဥပဒ်နဲတယ်ဆိုပေမယ့်လို့ ဆေးကြောင့် အဝလွန်တာတွေဖြစ်တတ်သေးတယ်လေ ပြီးတော့ ဖီလ်းမလာဘူးဆိုတာကလည်း မိန်းမက ကိုယ့်ခင်ပွန်းကို ကူညီလိုက်ရင် အဆင်ပြေသွားပါတယ် လွယ်လွယ်လေးပါ မမ သိလား”။ 

ဒီလောက်ဆို အဆင်ပြေပြီ၊ ခဲအိုနှင့် အစ်မတို့ အကြည့်ချင်းဆုံသွားကြ၏။ သုံးစွဲရန် ပစ္စည်းလည်း လိုက်ဝယ်ပေးလိုက်ပြီ၊ နည်းစနစ်လည်း လမ်းညွှန်လိုက်ပြီ။ ကိုင်း အဆင်ပြေသွားကြမယ့် စုံတွဲတော့ တစ်တွဲတိုးပြီ၊ ကိုယ့်အတွေးနှင့် ကိုယ်တွေးလို့ကောင်းတုန်းးးးးးးးးးးးးးး။

ဂြုန်း  
(ကျမတို့အိမ်က လူပြိုသိုးကြီး အစ်ကိုသည် တံခါးကို ဆောင့်ပိတ်လိုက်တဲ့အသံ)

အမယ်လေး လန့်လိုက်တာ အစ်ကိုကြီးကလည်း ဖြည်းဖြည်း တံခါးပိတ်ပါ။ 

လာခဲ့ လာခဲ့ နင့်ကို ငါတီးချင်နေတာ 

ဘာလဲ ဘာလုပ်မိလို့လဲ

ဟင် အခုမှ ဘာလုပ်မိလို့လဲ 

အမေရေ အမေ့သား ဘာပြောနေလဲမသိဘူး

ဘာဖြစ်ရမလဲ နင်လုပ်ပုံက ဟုတ်မှ မဟုတ်တာ

အင် ဘာ    ဘာာာာာာာ ဖြစ်

ဟင် ရှည်ကြောအုံး ..............ဒေါက် ဒေါင် 

သြော် ညည်းတော်တော် လျှာရှည်နေတယ် လာခဲ့ .........အိုး အီးးးးးးးးးး။

ဘယ်နှယ့် အပျိုလေးက ဒီအကြောင်းတွေကို အစ်မလင်မယားကို ပြောရသလား၊ 
ညည်းလုပ်ပုံနဲ့ ငါ့မျက်နှာသာ ဓားနဲ့ လှီးလိုက်ချင်တော့တာပဲ။ 
ရှည်ကြောလိုက်တာအေ!!!

ကျမ၏ ဘဝတွင် ရှည်ကြောမိသော အကြောင်းများစွာရှိပါသည်။ အများအားဖြင့် စေတနာနှင့် ရှည်ကြောမိခြင်းနှင့် နောက်တစ်ခုကတော့ မသိ နားမလည်လို့ဖြစ်သည်၊ သူများ အကူအညီလိုသည်ဆိုလိုကတော့ သိပ်မစဉ်းစားဖြစ်ခဲ့၊ ကိုယ်တိုင်ထိခိုက်စေမည်ကိုလည်း မတွေးတတ်ခဲ့ပါ။ အခုကိစ္စဆိုလျှင် မသင့်တော်သော ကိစ္စဖြစ်သည် သို့သော်အစ်မသည် ပြာယာခတ်နေသည်၊ ဆေးလည်း မသုံးချင်၊ အမျိုးသားနှင့်လည်း အဆင်ပြေလိုသည်။ ကွန်ဒုံးသုံးရန် မြန်မာအမျိုးသမီးတစ်ယောက်အနေဖြင့် မိမိခင်ပွန်းကို ပွင့်လင်းစွာပြောဖို့ မဝံ့မရဲဖြစ်နေခဲ့ပါသည်။ ထိုအရေးမှာ ကျမက ကြားဝင်မိ၏၊ အလုပ်ထဲမှာ ကျမအတွက် ပြဿနာမဟုတ်ပေမယ့် မိသားစုထဲမှာတော့ အမြင်သည် လုံးဝခြားနားသွားလေသည်။ ကျမကတော့ စာတွေး တွေးကာ အလုပ်သဘောဖြင့် ကူညီလိုက်သော်လည်းပဲ အစ်ကိုနဲ့ အမေကတော့ ဒီလိုမဟုတ်၊ ဒီလိုနဲ့ပဲ ခေါင်းခေါက်တာခံ၊ ဗိုက်ဆွဲလိမ်လို့ နာနေတာကြားက ရှည်ကြောစွာပင် ထပ်ရှင်းပြမိလေသည်။ အကြောင်းစုံသိသွားတော့မှ အစ်မရဲ့ အဖြစ်ကို စာနာမိကြပြီး ကျမလုပ်ရပ်ကိုလည်း သဘောပေါက်သွားပါတော့တယ်။ နောက်တစ်လလောက်ကြာတဲ့အခါ ကျမခရီးက ပြန်ရောက်တော့ အစ်မက အဆင်ပြေကြောင်း၊ အခုဆိုရင် သူ့ဖာသာ ပစ္စည်းလေးကို သွားဝယ်ကြောင်း၊ သူလည်း ဆေးဒဏ်တွေ မခံရတော့ကြောင်း ဝမ်းသာပျော်ရွှင်စွာ ပြောပါသည်။  ဒါ့အပြင် ဆံပင်ညှပ်ဆိုင်၊ အင်္ကျီချုပ်ဆိုင်တွေကိုသွားရင် မိန်းမတွေ အစု များတကလား၊  အိမ်ထောင်သည်အမျိုးသမီးတွေက သူတို့ အမျိုးသားတွေကို ပွင့်ပွင့်လင်းလင်းမပြောရဲတဲ့အတွက် အဆင်မပြေပုံမျိုးစုံ ကြားမိတော့ သက်ပြင်းတွေ ချရင်း သူတို့ပြဿနာလေးတွေကို သိသလောက်ပြောပြရင်း ကူညီပါရမီဖြည့်ပေးခဲ့ပါ၏။ သူတို့ကတော့ ကုသိုလ်ရပါတယ် ညီမရယ်တဲ့၊ အင် အနှီကုသိုလ်ကား အဘယ်နည်းးးးးးးးးးး။ 


လေးစားစွာဖြင့်
crystal

ပိုစ့်များစွာ စိတ်ကူးနှင့်ရေးထားသည်၊ လိုင်းပေါ်ဘယ်တော့ ရေးဖြစ်မည်မသိ၊ အာရုံတွေကို လိုက်လံ စုစည်းနေချိန်။ နောက်ထပ် ရှည်ကြောမိလေသောအဖြစ်များကို ရေးပါအုံးမည်။ 
မကြာမီ မကြာမီ မကြာမီ ...... :)

Thursday, March 17, 2011

ဂျပန်နိုင်ငံ၏ သတင်းတွေကြည့်လိုပါလျှင်

လွတ်မြောက်မှု အနာဂတ်ကို မျှော်ကြည့်ခြင်း
အခြားသော သတင်းဆိုဒ်များအပြင် ဂျပန်နိုင်ငံ၏ နောက်ဆုံးရသတင်းများ၊ 
ဂျပန်နိုင်ငံမှ ရေးသားသော ဘလော့ရေးသူတို့၏ အတွေ့အကြုံများ 
သတင်းများနှင့် မျှဝေလိုသော အကြောင်းအရာများကို သိရှိလိုပါလျှင်
ယင်းဘလော့ဆိုဒ်မှ တဆင့် သွားရောက်ကြည့်ရှုလေ့လာနိုင်ပါကြောင်း။

“ကမ္ဘာကြီး၊ သူ နေမကောင်းပါ”

ကမ္ဘာကြီးဗိုက်အောင့်နေလို့ ဆူနာမီအဖြစ်နဲ့ အန်ချလိုက် လူတွေ သောင်းချီသေကုန်ပါလေရော

ဒီလို ရစ်ရစ်ပြီး နာနေရှာတယ် 

တလှိုက်လှိုက်တက်လာနေပြီ

အန်ချလိုက်ပါပြီ

သူအန်ချလိုက်လို့ ဘေးပတ်ဝန်းကျင် ထိခိုက်ကုန်ပြီလေ

ဒီလိုဖြစ်ကုန်တော့ ကယ်ဆယ်ရေးလုပ်တာတွေမှာ ခက်ခဲမှုတွေဖြစ်နေရပြီ

အို ဘယ်နှယ့် ...တောင်နဲ့မြောက်များ ပစ်နေပြီလား၊ 
ဟုတ်ပါဘူးနော် ကမ္ဘာကြီးနေမကောင်းဖြစ်နေတာပါ...

ရုံးမှာ တူတူပုန်းတိုင်းဆော့နေကြတယ် ကြည့်အုံး စားပွဲခုံလေးအောက်ကို ဝင်လို့
တကယ်ဖြစ်ရင် မလွတ်ဘူးနော် ဒီလိုလေး မနေနဲ့ လွတ်အောင်သာပြေး ကွင်းပြင်ဆီကို။

ဒီချိန်မှာ သွားလာရလွယ်တဲ့ ဖိနပ်များကိုသာ ဝတ်ဆင်ပါ
 သတင်းတွေ အဆက်မပြတ်စေဖို့ပဲလိုတယ် ကျန်တာတွေ တွေးမနေနဲ့တော့

အကြောက်တရားကို ဘေးဖယ်ထား၊ ကယ်ဆယ်ရေးသာ အဓိက

ပစ္စည်းတွေ ပြတ်လပ်နေပြီဖြစ်လို့ လွယ်ကူစွာ စားနိုင်မယ့် အစားအသောက်တွေ အရေးတကြီးလိုအပ်နေပြီ

ဘဝတူတွေအဖို့ ခံစားချက်ခြင်းလည်းတူကြသတဲ့

နွေးထွေးမှုတွေ လိုနေတယ်

ထိတ်လန့်မှုများတဲ့နေ့ရက်များ

ထိုင်းလူမျိုးတစ်ယောက် ပေးပို့သော အီးမေးကို  ဆီလျော်သလို စာများရေးသားလိုက်ပါတယ်။

အခက်အခဲဖြစ်လေတိုင်း သောကဝေလေတိုင်း ရတနာသုံးပါးပဲ အားကိုးပါတယ်၊
ဝိပဿနာတရားနဲ့ ထိတွေ့ပေးခဲ့တဲ့ ကသစ်ဝိုင်ဆရာတော်ဦးပဒုမ၏ ရဟန်းဒကာမဖြစ်ခဲ့သော ကျေးဇူးရှင်အဘွားရဲ့ ကျေးဇူးများကို အောက်မေ့သတိရမိတဲ့နေ့ရက်များဖြစ်ပါတယ်။

မေတ္တာပို့၊ သစ္စာဆို၊ ပဋ္ဌာန်းနဲ့ ဂျပန်တစ်နိုင်ငံလုံးကို စည်းချ၊ အများအကျိုးကိုလိုလားသော လောကတွင်စောင့်ရှောက်လျှက်ရှိကြကုန်သော အစောင့်အရှောက်များကို တိုင်တည် အကူအညီတောင်း။ 

အေးချမ်းသွားမှာပါ၊ အဆင်ပြေသွားမှာပါ၊ ဘေးဆိုးတွေက လွတ်သွားမှာပါ။

ယုံကြည်ပါတယ်။

ကမ္ဘာကြီး နေကောင်းသွားမှာပါ။ 

နောင်ကို သူနေကောင်းအောင် လူသားတွေ ပိုဂရုစိုက်ရတော့မှာဖြစ်ပါတယ်။

လေးစားစွာဖြင့်
crystal

Sunday, March 13, 2011

ပြည်ဖျက်ငလျင်ဘေး၏ နောက်ဆက်တွဲများ

ဒေါင်းမာန်ဟုန်မှ ထပ်ဆင့်ကူးယူဖေါ်ပြပါသည်။

ပြင်းထန်သောမြေငလျင်နှင့်ဆူနမိကြောင့်ဖရိုဖရဲမြင်တွေ့ရသောကွန်တိန်နာများ




ငလျင်ဒဏ်ခံစားရပြီး ပိတ်မိနေသော ဂျပန်နိုင်ငံသားများအား ခက်ခက်ခဲခဲ ကြိုးစားကယ်ဆယ်နေပုံ(ဓာတ်ပုံမှတ်တမ်း)yomiurishinbun/AFP
မတ်လ (၁၁)ရက်နေ့မှာ ဖြစ်ပွားခဲ့တဲ့ ဂျပန်ငလျင်နောက်ဆက်တွဲနဲ့ ပတ်သက်ပြီး တီဗီတွေကနေ တောက်လျှောက်ပြနေတယ်။ ANN အဆဟိ သတင်းဋ္ဌာနကကောက်ယူတဲ့ စစ်တမ်းအရ သေဆုံးသူ (နာမည်comfirm) ဖြစ်သည့်အလောင်း တစ်ထောင် (၁၀၀၀ ကျော်)၊ ပျောက်ဆုံးနေသူ (နာမည်comfirm) တစ်ထောင့်တစ်ရာ (၁၁၀၀ ကျော်) နေပြီဖြစ်ပါတယ်။ စူနားမီတိုက်ရိုက်ခံစားလိုက်ရတဲ့ မြို့ငယ်များထဲမှာ လူ တစ်သောင်းခြောက်ထောင်ကျော်စီ နေထိုင်တဲ့ မြို့ငယ် (၃)ခုမှာ တမြို့လျှင် တစ်သောင်းဝန်းကျင်ခန့် (ပျောက်ဆုံး - comfirm မလုပ်နိုင်သေး) ဟုသိရှိရပြီး စုစုပေါင်းလူပေါင်း သုံးသောင်းကျော် အဆက်သွယ် လုပ်လို့ မရသေးဘူးလို့ ပြောပါတယ်။

ကမ္ဘာ့နိုင်ငံပေါင်း ၆၉ နိုင်ငံမှ အထူးကယ်ဆယ်ရေးအဖွဲ့များ စေလွှတ်မည်ဟု ကမ်းလှမ်းထားပြီး အမေရိကား၊ ဂျာမဏီ၊ ဆွစ်ဇလန်၊ တရုတ် တို့မှ စတင်ရောက်ရှိလာနေပြီဖြစ်ပါတယ်။ အမေရိကန်နိုင်ငံမှ CNN ၏ အချိန်တော်တော်များများမှာ ဂျပန်ငလျင်သတင်း ဦးစားပေးထုတ်လွှင့်ပေးနေသည်ဟု သိရှိရပါတယ်။

အမေရိကားပလိပ်၊ ဖိလစ်ပိုင်ပလိပ်၊ ပစိဖိတ်ပလိပ် ဆက်စပ်နေသည့်နေရာမှ ယခုငလျင်မှာ ဂျပန်နိုင်ငံအရှေ့ဖက် ပစိဖိတ်အတွင်းမှ ပစိဖိတ်ပလိပ်ရွေ့လျားမှုကြောင့် ဖြစ်ပေါ်ရခြင်းဖြစ်ပါသည်။ အလျား အရှေ့အနောက် ကီလိုမီတာ-၂၀၀၊ အနံ တောင်မြောက် ကီလိုမီတာ - ၅၀၀ အကျယ်အ၀န်းအတွင်းမှာ 7.0M အထက် ငလျင်ကြီးများ ၇ကြိမ်ဆက်တိုက်ဖြစ်ပေါ်ခဲ့ခြင်းဖြစ်ပါတယ်။ 5.6 M ၀န်းကျင်ငလျင်များ နေရာအနှံ့ ဆက်တိုက်လှုပ်နေပါသေးတယ်။ ငလျင်ကြီး ကြုံတွေ့ခံစားရသူများအဖို့ 5.0M ငလျင်များကို ငလျင်ဟု မထင်တော့သလို ဖြစ်တတ်တာကြောင့် သတိလက်မလွတ်ကြစေဖို့ ဆော်သြနေပါတယ်။ Japan Meteorological Agency (JMA) မှ မတ်လ - ၁၁ ရက်နေ့ ဖြစ်ပေါ်ခဲ့သောငလျင်အား မက်ဂနိကျု့ 8.8M ဟုဖေါ်ပြခဲ့ပြီး အမေရိကားမှ တိုင်းတာချက်အရ 8.9M ဟုဖေါ်ပြခဲ့ပါတယ်။

ယနေ့ မတ်လ - ၁၃ ရက်နေ့ ဂျပန်စံတော်ချိန် နေ့လည် ၁နာရီ JMA မှ ပြုလုပ်သော သတင်းစာ ရှင်းလင်းပွဲတွင် သြစတေးလျနိုင်ငံမှ တိုင်းတာချက် ဂရပ်ဖ်အား ပြန်လည်ကြည့်ရှုသုံးသပ်ပြီးနောက် မတ်လ - ၁၁ ရက်နေ့ လှုပ်သွားသော ငလျင်အား မက်ဂနိကျု့ 9.0M အဖြစ်ပြောင်းလဲသတ်မှတ်လိုက်ကြောင်း တရားဝင်ထုတ်ပြန်ကြေညာသွားပါတယ်။ 9.0M သည် ကမ္ဘာပေါ်တွင်ဖြစ်ပေါ်သော ငလျင်များထဲတွင် အကြီးဆုံးဖြစ်ပြီး မှတ်တမ်းများအရ နှစ်-၅၀၀ တွင်တကြိမ် ခန့်ဖြစ်ပေါ်သည်ဟုဆိုပါတယ်။ ၁၉၉၅ ကိုဘေးငလျင်သည် မက်ဂနီကျု့ 6.8M သာရှိသော်လည်း ငလျင်ဗဟိုချက်ဖြစ်သောကြောင့် ပျက်စီးဆုံးရှုံးမှု များပြားခဲ့ခြင်း ဖြစ်ပါတယ်။ ၁၉၉၉ တိုင်ဝမ်ငလျင်သည်လည်း 7.6M ဗဟိုချက် နှစ်ကြိမ်ဖြစ်ခဲ့ပါတယ်။

အမေရိကားပလိပ်၊ ဖိလစ်ပိုင်ပလိပ်၊ ပစိဖိတ်ပလိပ် ၃ခုလုံး တပြိုင်တည်းရွေ့လျားမှုဖြစ်ပေါ်နိုင်ခြေလည်းရှိပါ တယ်။ တပြိုင်တည်း ရွေ့လျားခဲ့ပါက ဖေါ်ပြရန်ခက်ခဲ့သော ကြီးမားပြင်းထန်သည့် ငလျင်များစွာ ဖြစ်ပေါ်နိုင်ပြီး ကြီးမားသော ဆူနာမီများလည်းဖြစ်ပေါ်လာနိုင်ခြေရှိပါတယ်။ လက်ရှိ ခန့်မှန်းထားကတော့ ဘယ်နေရာကို ဗဟိုပြုပြီးတော့ ဖြစ်ပေါ်လာမယ်မှန်းမသိနိုင်တဲ့ 7.0M ငလျင် ၃ရက်အတွင်းဖြစ်ပေါ်ရန် ၇၀% ဟုပြောကြား သွားပါတယ်။

အထက်ပါအကြောင်းအရာတွေကတော့ ANN နေ့လည် တစ်နာရီသတင်းကို ကြည့်ရှုပြီး အဆင်ပြေသလို တင်ပြထားခြင်းဖြစ်ပါတယ်။

အရေးပေါ်ကြိုတင်ပြင်ဆင်ခြင်းများ

ဂျပန်နိုင်ငံမှာ နေထိုင်နေကြတဲ့ မြန်မာနိုင်ငံသားများအနေဖြင့် မိတ်ဆွေအချင်းချင်း ဆက်သွယ်မှုပြုလုပ်ရန် ပြင်ဆင်ထားပါ။ တကယ်ငလျင်ကြုံတွေ့ရပါက ဖုန်းဆက်သွယ်မှုများ ပြတ်တောက်နိုင်ပြီး တိုက်များပြိုကျမှု၊ လမ်းများပျက်စီးမှုကြောင့် အရှေ့အနောက် တောင်မြောက် အရပ်တွေ မသိဖြစ်နိုင်ပါတယ်။ မိမိတို့အနေဖြင့် အမှတ်အသားတစ်ခုပြုလုပ်ပြီး အရေးပေါ်အခြေနေကြုံတွေ့လာပါက ထိုနေရာတွင်ဆုံတွေ့ လူစုကြနိုင်ရန် တိုင်ပင်ထားပါ။ မဖြစ်ပေါ်လာခဲ့လျင်တော့ အကောင်းဆုံးဖြစ်ပါသော်လည်း ဖြစ်ပေါ်လာခဲ့လျှင် ကံတရားက မျက်နှာသာပေးပါခဲ့က ကယ်ဆယ်ရေးများ မရောက်လာမီအချိန်အတွင်း အသက်အန္တရာယ် ကြိုတင် ကာကွယ်နိုင်စေဖို့ မိမိ၏ အရေးကြီးသော မှတ်တမ်းများ၊ စားစရာအနည်းငယ်၊ သောက်စရာရေ၊ လက်နှိပ်ဓါတ်မီး၊ တနိုင်ဆွဲပြေးနိုင်သော အိတ်တလုံးထဲတွင် အသင့်ပြင်ထားကြရန်လိုပါတယ်။ ဟန်းဖုန်းများတွင် ငလျင်အလမ်း ဆက်တင်ပါသဖြင့် ဖြစ်နိုင်ပါက ON ထည့်ထားကြပါ။ အိပ်သည့်အခါ ဘေးဘီတွင် ပြုတ်ကျလာနိုင်သော ပစ္စည်းများမရှိသည့် နေရာကို ရွေးချယ်အိပ်ပါ။ ယမကာသောက်တတ်သူများ ယခုရက်ပိုင်းအတွင်း ခေတ္တဂရုစိုက်ဆင်ခြင်သင့်ပါသည်။

ယခုရေးသားနေသည့်အချိန်တွင်လည်း မရေမတွက်နိုင်သော ငလျင်များဖြစ်ပေါ်နေပါသည်။ ပုံတွင်ကြည့်ရှုပါ။


အသေးစိတ် update news များဖတ်လိုပါက JMA Home Page မှာ လေ့လာနိုင်ပါတယ်။ ငလျင်ဒဏ် ဆူနာမီဒဏ်ကြုံတွေ့နေရခြင်းအပြင် နယူကရီးယားဓါတ်အားပေးစက်ရုံ ယိုစိမ့်မှုပြဿနာလည်း ရင်ဆိုင် နေရပါတယ်။
အားလုံးသော ဂျပန်ရောက် မြန်မာနိုင်ငံသာများ ကံဇာတ်ဆရာ၏ မျက်နှာသာပေးမှုကို ခံယူနိုင်ကြပါစေ ခင်ဗျာ။
mmcpcommunityမှ Dragon Ballအားကျေးဇူးတင်ရှိပါသည်....

Sunday, March 6, 2011

စောင့်မျှော်နေတဲ့ အနာဂတ်များ

 ပုံကို ဂူဂယ်မှ ကူးယူပါသည်။

ကျွန်တော် ဂျပန်ပြည်စရောက်တဲ့အချိန်ကစလို့ နေ့စဉ် သွားရင်းလာရင်း သတိပြုမိခဲ့တာ တစ်ခုရှိခဲ့ပါတယ်။ အဲဒါကတော့ ဒီမြို့က လူငယ်လေးတွေပါဘဲ။ ကျွန်တော်ကိုယ်တိုင် ဆယ်ကျော်သက်အရွယ်ကို ဖြတ်သန်း လာခဲ့ဖူးတာရော၊ အဲဒီကနေတဆင့် အသက်(၂၀) အရွယ်ကနေ အခု (၃၀) ကျော် ဖြစ်လာခဲ့တဲ့အထိ ဖြတ်သန်းခဲ့ရတဲ့ ဘ၀အစိတ်အပိုင်းများက ဒီကလူငယ်တွေအပေါ် ပိုပြီး စိတ်ဝင်စားမှုကို ဖြစ်စေပါတယ်။ ဒီမှာ ကျွန်တော်မြင်နေရတဲ့ လူငယ်တွေကို ကြည့်ကြပါအုံး။ သူတို့ရဲ့  မျက်နှာတွေမှာ အထင်ရှားဆုံးတွေ့ရတာက လူငယ်သဘာဝ လွတ်လပ်မှုနှင့် တက်ကြွလန်းဆန်းနေမှုပဲဖြစ်ပါတယ်။ သူတို့တွေမှာ မိမိဘ၀အပေါ် ယုံကြည်စိတ်ချနေမှုက သူတို့လှုပ်ရှားသွားလာနေပုံကိုကြည့်ရင် အထင်းသားတွေ့မြင်နိုင်ပါတယ်။ သူတို့စိတ်ဝင်စားတဲ့ ၀ါသနာပါတဲ့ ပညာရပ်ဆိုင်ရာသော်လည်းကောင်း၊ ဒါမှမဟုတ် စာပေ၊ ဂီတ၊ အနုပညာ၊ အားကစား တစ်ခုခုကို နှိုက်နှိုက်ချွတ်ချွတ် ထဲထဲဝင်ဝင်လေ့လာဖို့ စိုင်းပြင်းနေတာကို သူတို့ရဲ့  လှုပ်ရှားမှုတွေက သက်သေခံနေကြပါတယ်။ စားသောက်ဆိုင်တွေမှာ သူငယ်ချင်းတွေ စုပြီး စားကြ သောက်ကြတဲ့အချိန်မှာဆိုရင်လည်း စိတ်လွတ်လပ်မှုကို အပြည့်အ၀ခံစားရင်း ပျော်ရွှင်ကြည်နူး နေနိုင်ကြတာကို သတိထားမိပါတယ်။ သူတို့ဘ၀လေးတွေ ဘာကြောင့် အခုလို လွတ်လပ်အေးချမ်း နေကြတာပါလိမ့်။

ကျွန်တော်တို့ ဖြတ်သန်းခဲ့ရတဲ့ လူငယ်ကျောင်းသားဘ၀ကို ပြန်စဉ်းစားကြည့်မိပါတယ်။ ဆယ်တန်းအောင် တဲ့အချိန်မှာ တက်စရာ တက္ကသိုလ်က အဆင်သင့်ရှိမနေခဲ့ပါဘူး။ မြန်မာပြည်အခြေအနေက တက္ကသိုလ်တက်ဖို့အတွက် သုံးနှစ်လောက်စောင့်ရပါမယ်တဲ့။ အဲဒီမှာတင် လူငယ်ထုဘ၀ဟာ ကမောက်ကမ စဖြစ်ကြရတော့တာပါဘဲ။ ဒီစောင့်ရမယ့်သုံးနှစ်ကို ဘယ်လိုဖြတ်သန်းကျော်လွန်ကြမလဲ။ တချို့ ကတော့ ဘ၀တိုးတက်ကြောင်းအတွက် အထောက်အကူဖြစ်စေမယ့် သင်တန်းတွေလျှောက်တက်ရင်း အချိန်ကို အသုံးချလိုက်ကြတယ်။ တချို့ ကတော့ နိုင်ငံခြားကိုထွက်သွားကြတယ်။ တချို့ လည်း အလုပ် လုပ်တော့မယ်ဆိုပြီး နီးစပ်ရာ လုပ်ငန်းခွင် တစ်ခုခုထဲ ၀င်လိုက်ကြရတယ်။ တချို့ လည်း အပျံသင်စအရွယ် အလည်လွန်ရင်း အိမ်ထောင်သည်ဘ၀ပြောင်းခဲ့ကြရတယ်။ တချို့ လည်း ယောင်လည် ယောင်လည် အခြေစိုက်သွားကြတယ်။ မိဘဆွေမျိုး ကျောထောက်နောက်ခံကောင်းတဲ့သူတွေကတော့ သိပ်အထိ မနာကြပေမယ့်လို့ အခြေခံလူတန်းစားဘဝဖြစ်တဲ့ လက်လုပ်လက်စား မိဘတွေရဲ့ သားသမီးတွေအတွက် ကတော့ အနာဂတ်ဟာ အဲဒီအချိန်မှာ စပြီး မှုန်ဝါးသွားရတော့တာပါဘဲ။

ကိုယ်လုပ်ချင်တာက တစ်ခု၊ ပေးလာတဲ့ ဘ၀အခြေအနေအရပ်ရပ်ကြောင့် လုပ်ချင်တာကို လုပ်ခွင့်မရဘဲ လုပ်သင့်တာကိုလုပ်ရင်း စိတ်ဝင်စားရာ၊ ၀ါသနာပါရာ တွေကို ရင်ထဲမှာ ကြိတ်မှိတ်မျိုသိပ်လိုက်ရတဲ့ လူငယ်ထုအရေအတွက်က ရာခိုင်နှုန်းနဲ့ ရေတွက်ကြည့်မယ်ဆို (၉၀)များကျော်မလားမသိ။ တက္ကသိုလ်က ဘွဲ့တစ်ခုရပြီးချိန်မှာ အလုပ်ရဖို့အခွင့်အလမ်းသာမယ့် အပေါ်မူတည်ပြီး အဓိကစဉ်းစားကြရတော့ ကိုယ်ဝါသနာပါတာကို ဘ၀တွေ၊ စိတ်တွေနှစ်ပြီး လုပ်ဖို့ဆိုတာ ဝေလာဝေးရော။ ကျောင်းပြီးလို့ အလုပ်ထဲဝင်ပြီး ၀င်ငွေအမြန်ဆုံးရဖို့အတွက် ကိုယ့်ကို မျှော်လင့်စောင့်စားနေကြတဲ့ မိသားစုတွေ ရှိနေတဲ့ လူငယ်တွေမှာဆို ကျောင်းသားဘ၀ဖြတ်သန်းနေရတာက သူတို့အတွက်တော့ ၀န်ထုပ်ဝန်ပိုးကြီးတစ်ခုပါပဲ။

နိုင်ငံခြားတိုင်းပြည်တွေမှာလို ကျောင်းတက်ရင်း အချိန်ပိုင်းအလုပ်လုပ်တယ်ဆိုတဲ့ ဝေါဟာရက မြန်မာလူငယ်တွေကြားမှာတော့ တစိမ်းဆန်ဆန်ပါဘဲ။ (ဒီဘက်နှစ်တွေမှာတော့ အဝေးသင် တက္ကသိုလ်တွေဖွင့်လိုက်ပြီး အလုပ်သမားတွေအတွက် စီစဉ်ပေးထားတော့ ရှိနေပါပြီ။ ဒါပေမယ့် Day ကျောင်းသားတွေအတွက် ကျောင်းတက်ရင်း အချိန်ပိုင်းလုပ်လို့ရတဲ့ နေရာဌာနဆိုတာ အတော်လေးကို ရှားနေပါသေးတယ်။) တချို့ ကတော့ ကျောင်းတက်ရင်းတဖက်နှင့် ကျူရှင်ဆရာတွေ၊ Study Guide လို့ခေါ်တဲ့ ကျောင်းသားတွေကို စာကူပြပေးတာမျိုးတွေ လုပ်ရင်း ၀င်ငွေရှာကြတာတော့ ရှိပါတယ်။ အများစုကတော့ ကျောင်းတစ်ခုတည်းကိုသာ တစ်စိုက်မတ်မတ်တက်ကြတော့တာပါဘဲ။ ကျောင်းချည်းပုံမှန် တက်နေလို့  ပညာရေးဘက်မှာ ထူးချွန်ထက်မြက်သူတွေ ဖြစ်လာကြလိမ့်မယ်လို့လည်း မျှော်လင့်ချက်က ထားလို့ မရနိုင်ပါဘူး။ ဘာလို့လဲဆိုတော့ တက္ကသိုလ်မှာ သင်ကြားပေးနေတဲ့ ပညာရေးစနစ်က နိုင်ငံတကာအဆင့်မီအောင် အရည်အချင်းမပြည့်မှီဘဲ စာမေးပွဲမှာ ဖြေနိုင်ရုံ သက်သက်မျှလောက်သာ အသုံးတည့်တာမို့ ဘ၀အတွက် ရည်ရွယ်လေ့လာချင်သူတွေအနေနှင့်ကတော့ ပြဒါးတစ်လမ်း သံတစ်လမ်း ပါဘဲ။ ဒီတော့ အဖြေက ရှင်းပါတယ်။ ကျောင်းပြီးရင် ဘာဖြစ်လာမလဲဆိုတော့ ဘွဲ့လက်မှတ်တစ်ခုရတာကလွဲ ဘာများထပ်ဖြစ်စရာ ရှိနိုင်မှာလဲ။

ဒီလိုနှင့် ကျောင်းပြီးသွားတော့ ဘွဲ့ဆိုတာကြီးကို ပွေ့ဖက်ရင်း ကိုယ်သင်ယူခဲ့တဲ့ ပညာရပ်နှင့် ဘယ်လိုမှ မပတ်သက်တဲ့ လုပ်ငန်းခွင်တွေထဲ ၀င်ရောက်လုပ်ကိုင်ကြရတော့တာပါဘဲ။ ကျောင်းမပြီးခင် ကျောင်းတက်နေတဲ့ အချိန်တောက်လျှောက်မှာလည်း ကျောင်းစာကို ဖြောင့်ဖြောင့်တန်းတန်းသင်ဖို့အရေးထက် ကျောင်းပြီးရင် ငါဘာလုပ်ရပါ့ ဆိုတဲ့အတွေးက ဒီကျောင်းသားကို အမြဲနှိပ်စက်နေတာပါ။ လူငယ်တို့သဘာဝ လွတ်လပ် တက်ကြွ လန်းဆန်းဖို့ဆိုတာ ဝေးစွ။ သို့ပေမယ့်လို့ ဘာပဲဖြစ်ဖြစ် ကိုယ်ရတဲ့ အတိုင်းအတာအတွင်းမှာတော့ တတ်နိုင်သလောက် ပျော်စရာတွေဖန်တီးပြီး အဆင်ပြေအောင် နေကြရတာပါဘဲလေ။ တခြားနိုင်ငံက ကျောင်းသားလူငယ်တွေနှင့်တော့ ပခုံးချင်း လာမတိုင်းနှင့်ပေါ့။

အခု ကျွန်တော်ရောက်နေတဲ့နိုင်ငံမှာလည်း ကျောင်းသားတွေကျောင်းပြီးရင် အလုပ်မရကြလို့ အလုပ်လက်မဲ့ပြဿနာဆိုတာကြီးက ဒီနိုင်ငံကအစိုးရကို ခေါင်းကြီးနေစေတာ နှစ်တော်တော်ကြာ ရှိနေပါပြီ။ ဒါပေမယ့် ကိုယ့်တိုင်းပြည်နှင့်ယှဉ်လိုက်ရင်တော့ သူဌေးသင်္ဘောပျက်တာနှင့် သူတောင်းစားခွက် ပျောက်တာနှင့် လိုပါဘဲ။ ဒီနိုင်ငံက အဆင်မပြေဖြစ်နေတာလောက်တော့ ကိုယ့်တိုင်းပြည်အခြေအနေက ပျင်းတောင်ပျင်းသေးတယ်လို့ ပြောလို့ရပါတယ်။

ဒီက လူငယ်တွေဘ၀ကို တစ်ဘက်ကနေ သဘောကျ ကျေနပ်မိသလို အခြားတစ်ဘက်ကလည်း အားမရဖြစ်မိတာရှိပါတယ်။ သူတို့တွေမှာ ဒီလောက် ရေခံ မြေခံ ကျောထောက်နောက်ခံကောင်းတဲ့ နိုင်ငံရေးစနစ်၊ ပညာရေးစနစ်၊ စီးပွားရေးစနစ် စတာတွေရှိနေပါလျက်နှင့် ကြိုးစားအားထုတ်မှုအပိုင်းမှာ သိပ်တော့ အားရစရာ မရှိပါဘူး။ ဘ၀ကို သူဌေးသား သူဌေးသမီးတွေလို ကြောင့်ကြမဲ့ ပေါ့ပေါ့လေး ဖြတ်သန်းနေကြတဲ့ပုံ ပေါ်နေပါတယ်။ ကိုယ်တွေရဲ့ နိုင်ငံမှာ ဒီလိုမျိုး အခွင့်အရေးကောင်းတွေသာ ရကြည့်လိုက်စမ်းပါ။ ကျွန်တော်တို့ တိုင်းပြည်က လူငယ်တွေ ဒီကလူငယ်တွေထက် အဆပေါင်းများစွာ သာအောင် ကြိုးစားပြနိုင်ပါတယ်။

အခုတောင် မြန်မာပြည်ကလူငယ်တွေဟာ ရသလောက် အခွင့်အရေး အလင်းရောင် မှုန်မှုန်မွှားမွှားလေးနှင့် အနာဂတ်ကို မရရအောင် ခရီးဆက်နေကြသေးတာပဲ။ ကိုယ်တွေက သူဌေးသားသမီးတွေမှ မဟုတ်တာကိုး။ ဘ၀က နာထားကြတာ။ တချိန်ချိန် အခွင့်အရေးနဲ့ အခွင့်အလမ်းတွေသာ ပေါ်လာစမ်းပါစေ၊ ရလာတဲ့ ပေးလာတဲ့ အခွင့်အရေးကို လက်မလွှတ်တမ်း ဆုပ်ကိုင်းရင်း အားကြိုးမာန်တက် ကြိုးစားကြမယ်ဆိုတာကို ရဲရဲကြီးပြောနိုင်ပါတယ်။

မဝေးတော့တဲ့ တချိန်ချိန်မှာတော့ ကျွန်တော်တို့တိုင်းပြည် အနာဂတ်အတွက် တောက်ပြောင်လင်းလက်တဲ့ တက်ကြွလန်းဆန်းနေသော ညီငယ်ညီမငယ် လူငယ်မျိုးဆက်သစ်တွေ တကျော့ပြန်လည် မြင်တွေ့နိုင်တော့မယ်လို့ ရင်ထဲက ယုံကြည်မျှော်လင့်နေမိပါတယ်။

လေးစားစွာဖြင့်
Bliss 
၁၅-ဖေဖေါ်ဝါရီလ-၂၀၁၁ (1:03 AM)