ကျွန်တော့်ကို ဂီတနှင့် စပြီး ရင်းနှီးအောင် မိတ်ဆက်ပေးတဲ့ သူတွေက ကျွန်တော့်မိဘနှစ်ပါးပါ။ ကျွန်တော်စတင် အကျွမ်းဝင်ခဲ့ရတဲ့ အဆိုတော်ကို ပြောရရင်တော့ ဦးအံ့ကြီး သီချင်းပါဘဲ။ ကျွန်တော် လူမှန်းစသိတတ်စအရွယ်မှာ အမေက တခါတလေ စိတ်လက်ပေါ့ပါးနေချိန်တွေမှာ သီချင်းလေးတညည်းညည်းနှင့် နေတတ်ပါတယ်။ တခါတလေကျရင်တော့ ကက်ဆက်ဖွင့်ပြီး သီချင်းနားထောင်တတ်ပါတယ်။ သူဆိုလေ့ဆိုထရှိတဲ့၊ နားထောင်တတ်တဲ့သီချင်းကတော့ ဦးအံ့ကြီးရဲ့ သီချင်းတွေပါ။ ဒီတော့လည်း ကျွန်တော်တစ်ယောက် ငယ်ငယ်ရွယ်ရွယ်နှင့် မောင်အံ့ကြီးသီချင်းနှင့် ဇိမ်ကျခဲ့ရတာပေါ့။
အဲ...အဖေကျတော့ တစ်မျိုး။ သူက များသောအားဖြင့် အိမ်မှာ သိပ်မနေရဘဲ အမြဲခရီးသွားနေရတတ်တယ်။ သူအိမ်ပြန် ရောက်ပြီဆိုရင်တော့ ညပိုင်းဆို အိမ်ရှေ့ ဝရံတာမှာ ထွက်ထိုင်ပြီး ဘာဂျာလေး မှုတ်တတ်ပါတယ်။ သူအမြဲလို မှုတ်တတ်တဲ့ သီချင်းကလည်း ဦးအံ့ကြီး သီချင်းတွေပါဘဲ။ အင်း...လိုက်လည်းလိုက်တဲ့ လင်မယားနှစ်ယောက်လို့ ကောက်ချက်ချရမှာ ပါပဲလေ။
ဘာဖြစ်ဖြစ် ကျွန်တော်က သူတို့ နှစ်ယောက်ကြောင့် အသက်ငယ်ငယ်ရွယ်ရွယ်နှင့်တော့ ဂီတကို ရင်းနှီးကျွမ်းဝင်ခွင့်ရခဲ့ပါတယ်။ ကျွန်တော်ကိုယ်တိုင်လည်း ဂီတကို နှစ်သက်ပါတယ်။ စွဲလမ်းပါတယ်။ ဂီတအမျိုးအစားပေါင်းစုံ၊ အဆိုရှင် ပေါင်းစုံတို့ ရဲ့  သီချင်းတွေကို နားထောင်ဖြစ်ခဲ့ပါတယ်။ အခုလို အင်တာနက်ကို သုံးချင်တိုင်းသုံးလို့ ရနေတဲ့ နေရာ ရောက်နေတော့ ပိုပြီးအကြိုက်တွေ့ တော့တာပေါ့။ တစ်ကမ္ဘာလုံးက သီချင်းပေါင်းစုံကို ရှာချင်ရာ ကောက်ရှာ နားထောင်ဖြစ်နေလို့  ကိုယ့်ကိုယ်ကို ဘရိတ်တော်တော် အုပ်ယူနေရပါတယ်။
ခုနက စကားပြန်ဆက်ရရင်။ ကျွန်တော့် အဖေ ဘာဂျာမှုတ်တာ တော်တော်ကို နားထောင်လို့ ကောင်းတယ်ဗျ။ အဆွဲအငင်အတုန်အခါ အားလုံး စနစ်တကျ သေသေသပ်သပ်ရှိတယ်။ ကျွန်တော်က မေးကြည့်တယ်။ ဘယ်မှာ သင်ခဲ့တာလဲလို့  ဆိုတော့ မသင်ပါဘူး။ သူများတွေမှုတ်တာ ဒီလိုဘဲကြည့်ပြီး လိုက်မှုတ်ကြည့်တာလို့ ပြန်ဖြေတယ်။ ဒါနဲ့ ကျွန်တော်လည်း အားကျမခံ သူမှုတ်တာ မှတ်ထားပြီး လိုက်မှုတ်ကြည့်တာ၊ အဆင်မပြေပါဘူးဗျာ။ နားဝင်ပီယံမရှိတာနဲ့ နောက်ဆုံးတော့ လက်လျှော့ လိုက်ပါတယ်။
လသာတဲ့ညများဆို အိမ်ရှေ့ဝရံတာမှာ ပက်လက်ကုလားထိုင်လေးနှစ်လုံးချပြီး အဖေက ဘာဂျာလေးမှုတ်လိုက်၊ ဆေးတံလေး ဖွာလိုက်၊ အမေက ဘေးကခုံမှာထိုင်ပြီး ကုလားထိုင်လက်တင်မှာ အဖေ့ဘာဂျာသံကို လက်နှင့် စည်းချက်လိုက်နဲ့ ။ အတော်တော့ ဟန်ကျသားဗျ။
နောက်ပိုင်း အဆိုတော်တွေရဲ့ performance တွေ ကြည့်ဖြစ်တော့ တကယ့်နာမည်ကြီးတွေလည်း ဘာဂျာ တကိုင်ကိုင်နှင့်ဆိုတာ တွေ့လာရတယ်ဗျ။ မြန်မာပြည်မှာဆိုလည်း ထူးအိမ်သင်တို့၊ ဇော်ဝင်းထွဋ်တို့။ နိုင်ငံတကာ အနေနှင့်ဆိုရင်လည်း Rod Stewart တို့ ၊ Phil Collin တို့ ၊ Eric Clapton တို့ စတဲ့ ပုဂ္ဂိုလ်ကျော်တွေကစလို့  နောက်ပိုင်း အဆက်ဆက် အဆိုတော်တွေ ဘာဂျာလေးတွေ ထုတ်ထုတ်မှုတ်တာ သတိထားမိလာတယ်။
ကျွန်တော်တွေးကြည့်မိတယ်။ အဖေတို့ အမေတို့ ခေတ်တွေတုန်းက သမီးရည်းစားပိုးတဲ့အချိန်တွေမှာ ဘာဂျာဟာ စစ်ကူကိရိယာ တစ်ခုအနေနှင့် ရေပန်းစားလောက်မယ်လို့။ ဘာမှ ကရိကထ မများ။ လေ, လေးတစ်ခု စိုက်ရုံနှင့် အလုပ်ဖြစ်တယ်။ ဒီဘက်ခေတ်မှာသုံးတဲ့ ဂစ်တာကမှ လက်နာတာရယ်၊ မတော်လို့  ဂစ်တာ ကြိုးပျက်ရင် ကိုယ့်ပြန်မှန် နိုင်သေးတယ်။
ကျွန်တော့်မှာတော့ အတိတ်ဘဝပေးပါရမီက နဲလေတော့ ဘာမှလည်း မတီးတတ်၊ မမှုတ်တတ်။ သီချင်းဆိုဖို့ ကျပြန်တော့ အသံက မလာ။ ဒါပေမယ့် တော်သေးတာက အိုင်တီခေတ်ထဲမှာ လူလာဖြစ်လို့ ။ အဲ...ကံကြမ္မာက ကိုယ့်ဘက်ပါချင်တော့ တခါ အင်တာနက်ကို ချောချောမွေ့ မွေ့ လေးသုံးလို့ ရတဲ့ နေရာကိုလည်း ရောက်နေ။ You tube ဆိုတာကြီးကလည်း အထင်အရှားရှိ နေလေတော့။ မြန်မာသီချင်းနားထောင်မလား၊ အင်္ဂလိပ်သီချင်းလား၊ စပိန်လိုလား၊ ဂျပန်လိုလား။ ဘာနားထောင်မလဲ သာပြော။ တခြားဘာသာနှင့်သီချင်းမို့ လို့  အဓိပ္ပါယ်နားမလည်ဘူးဆိုရင် အဓိပ္ပါယ်ပါ တစ်ခါတည်း ပြန်ပေးမယ်။ ကဲ မနိပ်ဘူးလားဗျာ...။
အခုတော့ ဒီလ (၈) ရက်နေ့ အမှတ်တရ အဖြစ် မိရိုးဖလာ အဆင်အလာလည်း မပျက်ရလေအောင် ကျွန်တော့် favorite သီချင်းတစ်ပုဒ်လည်းဖြစ် အဖေ ဘာဂျာလေးနဲ့ အမြဲမှုတ်လေ့ မှုတ်ထရှိတဲ့ သီချင်းလေးလည်းဖြစ်သော ဦးအံ့ကြီးရဲ့ သီချင်းလေးကို
Bliss
ကျွန်တော့ရဲ့ မဟေသီထံ အကြည်တော်ဆက်လိုက်ပါဦးမယ်။ နားဆင်တော်မူကြပါခင်ဗျား...။
လေးစားစွာဖြင့်Bliss
No comments:
Post a Comment